ئاگرەكەی ڕێگەی قوشتەپە لە هەولێر كۆنترۆڵكرا

ئاڤا نیوز

ئەو ئاگرەی لە كارگەیەكی كلێنس لە هەولێر كەوتەوە شەش كارگەی گرتەوە و سێ كۆگاشی بەتەواوەتی سووتاندووە، تیمەكانی بەرگریی شارستانی هەولێر كۆنترۆڵیان كردووە.

چیرۆكی سەرەكی: كاتژمێر 6:48 خولەكی ئەمشەو لەڕێگەی قوشتەپە لە نزیك گوندی مورتكە لە هەولێر كارگەیەكی كلێنس گڕیگرت و بەهۆی تەشەنەكردنی ئاگرەكەوە سێ كۆگا و شەش كارگە گڕیانگرت.

زانیاریی بەدەستهاتوو: ڕزگار كۆچەر، پەیامنێری ئاڤا نیوز گوتی: ئەو كارگەیەی سەرەتا گڕیگرت تەواو داڕماوە و بەهۆیەوە ئاگرەكە بۆ دوو كۆگا و دوو كارگەی دیكە تەشەنەی كردووە و تائێستا سێ كۆگا بەتەواوی بەهۆی ئاگرەكەوە سووتاون.

لێدوانی فەرمی: كاروان عەلی، گوتەبێژی بەرگریی شارستانی هەولێر بۆ ئاڤا نیوز گوتی: ئاگری كارگەی كلێنس لەڕێگەی قوشتەپە لە نزیك گوندی مورتكە لە هەولێر شەش كارگەی گرتووەتەوە و سێ كۆگاش بەتەواوی سووتاون، بەڵام ئاگرەكە كۆنترۆڵ كراوە.

ئەوەی پێویستە بیزانیت: تیمەكانی بەرگری شارستانی بەردەوام لە شوێنی ڕووداوەكە دەبن بۆڕێگری لە مەترسی دووبارە سەرهەڵدانەوەی ئاگرەكە.