کۆبوونەوەی ئەنجوومەنی وەزیرانی عێراق کۆتاییهات و باسی مووچە نەکرا

ئاڤا نیوز

چاوەڕوان دەکرا لە کۆبوونەوەی ئەمڕۆی ئەنجوومەنی وەزیرانی عێراق لە پەراوێزی کۆبوونەوەکە، سوودانی بڕیار لەسەر مووچەی مانگی شەشی فەرمانبەران بدات، بەڵام ئاڤا زانیویەتی باسی ئەو بابەتە نەکراوە.

زانیاریی پەیامنێر: دەروون مەلا ناجی، پەیامنێری ئاڤا لە بەغدا ڕایگەیاند، لە کۆبوونەوەکە بە یەک وشەش باسی مووچەی فەرمانبەرانی هەرێمی کوردستان نەکراوە. ئەمە لە کاتێکدایە ڕاپۆرتی ئەو لیژنەیە تەواو کراوە کە هەفتەی ڕابردوو ڕاسپێردرا بوون بۆ بابەتی نەوت و داهات ئامادەی بکەن.

ئەوەی پێویستە بیزانیت: بەهۆی چلەی ئیمامی حوسێن، تا ڕۆژی پێنجشەممە 14-8-2025 لە پارێزگاکانی ناوەڕاست و خوارووی عێراق پشوو دەبێت، بۆیە بڕیاردان لەسەر مووچە دەکەوێتە هەفتەی داهاتوو.

لەلایەکی دیکەوە: سەرچاوەیەک لە وەزارەتی دارایی و ئابووریی حکومەتی هەرێمی کوردستان بە ئاڤا میدیای ڕاگەیاند، "بە تەیف سامی، وەزیری دارایی عێراقمان وتووە، تەنیا بۆ مانگی شەش دەتوانرێت 120 ملیار دینار وەک داهات ڕەوانە بکرێت. بۆ مانگی حەوت داهات ناگاتە 120 ملیار دینار، بۆیە ئەو بڕە کەم دەبێتەوە و شاندێک دەچێتە بەغدا."