زیاتر لە 500 هەزار کارتی بانکی دراوەتەوە فەرمانبەران

ئاڤا نیوز

دوایین ئاماری پڕۆژەی "هەژماری من" دەریدەخات تا ئێستا زیاتر لە 500 هەزار کارتی بانکی دراوەتەوە فەرمانبەران و ئەو ژمارەیە ڕۆژ دوای ڕۆژ زیاد دەکات.

وێنە گەورەکە: پڕۆژەی "هەژماری من" یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان، ئامانجەکە ئەوەیە تا کۆتایی ساڵی 2025 هەموو فەرمانبەران ببنە خاوەنی کارتی بانکی.

ڕاگەیێنراوی فەرمی: عەزیز ئەحمەد، جێگری بەڕێوەبەری نووسینگەی سەرۆکوەزیران ڕایگەیاند، ئێستا زیاتر لە 500 هەزار کارتی بانکی گەیێنراوەتە دەست فەرمانبەرانی مەدەنی و هێزە ئەمنییەکان لە هەموو پارێزگاکان.

عەزیز ئەحمەد ئەوەشی ڕاگەیاندووە، حکومەتی هەرێمی کوردستان بەنیازە بۆ مووچەی مانگی داهاتوو، مووچەی 437 هەزار مووچەخۆر لەڕێگەی کارتی بانکییەوە دابەش بکات، ئەم ژمارەیەش دەریدەخات مانگانە بە ڕێژەی 15% پرۆسەکە گەشە دەکات.

ئەوەی پێویستە بیزانیت: بەپێی داتای تیمی هەژماری من، تا ئێستا 800 هەزار مووچەخۆر ناویان لە پڕۆژەی هەژماری من تۆمار کردووە و بەردەوام زیاد دەکات. تا کۆتایی ساڵ هەموو فەرمانبەران دەبنە خاوەنی کارتی بانکی.