لە دوو ڕۆژدا 12 هەزار کەس بە شێوەی ئەلیكترۆنی ناویان بۆ حەج تۆمار کردووە

ئاڤا نیوز

لە ماوەی دوو ڕۆژی ڕابردوودا، زیاتر لە حەوت هەزار و 300 دواکاریی بۆ خۆ تۆمارکردن بە شێوەی ئەلیكترۆنی بۆ حەجکردن پێشکەشکراوە کە زیاتر لە 12 هەزار کەس لەخۆدەگرێت.

چیرۆکی سەرەکی: ڕۆژی یەکشەممە 10-8-2025، وەزارەتی ئەوقاف و كاروباری ئایینیی هەرێمی كوردستان، ماڵپەڕی "دەروازەی حەج"ـی بۆ تۆماری ساڵانەی حاجییان لە پرۆسەی حەج ڕاگەیاند، بەم شێوەیە حاجییان دەتوانن بەشێوەی ئەلیکترۆنی و بەبێ بەرامبەر لە بەستەری وێبسایتەكە، خۆیان بۆ پرۆسەی حەج ناونووس بکەن، تا ئێستاش هەزاران کەس ناوی خۆیان تۆمار کردووە.

لێدوانی فەرمی: هیوا ئەفەندی، سەرۆکی فەرمانگەی تەکنەلۆجیای زانیاریی ڕایگەیاندووە، لە ماوەی دوو  ڕۆژی یەکەمی کردنەوەی پۆرتاڵی حەج، زیاتر لە حەوت هەزار و 300 داواکاری پشکەشکراوە کە زیاتر لە 12 هەزار کەس لەخۆدەگرێت.

- ڕێژەی تۆمارکردنی ناوی پیاوان هەشت هەزار و 419 کەس بووە، دەکاتە 69.5%، هاوکات ڕێژەی ئافرەتان سێ هەزار و 690 کەس بووە، دەکاتە 30.5% پرۆسەکەش بەردەوامە.

- ئاسانکاری بۆ هاووڵاتیان لەڕێگەی تەکنەلۆجیای دیجیتاڵی لە چەقی بەرنامەی کابینەی نۆیەمی حکومەتی هەرێمی کوردستان دابووە.

ئەوەی پێوستە بیزانیت: کاتێک ئەو ڕێکارانە دەگریتەبەر و ناوەکەت لە سایتەکە وەردەگیرێت، چاوەڕێی تیروپشک دەکەیت و لەڕێگەی سایتەکەشەوە ئەنجامەکەی وەردەگریتەوە.