کۆشکی سپی: گفتوگۆکانی ترەمپ و پووتین گوێگرتنە نەک دانوستان

ئاڤا نیوز

کۆبوونەوەی لووتکەی نێوان ترەمپ و پووتین بەڕێوەیە و وتەبێژی کۆشكی سپیش کۆبوونەوەکە بە "مەشقی گوێگرتن" وەسف دەکات، واتە پێشبینی ناکرێت ڕێککەوتنی تێدا بکرێت.

وێنە گەورەکە: لە چوارچێوەی هەوڵە دیپلۆماسییەکان بۆ کۆتاییهێنان بەجەنگی نێوان ڕووسیا و ئۆکراینا، ڕۆژی هەینی هەر یەکە لە دۆناڵد ترەمپ، سەرۆکی ئەمریکا و ڤلادێمیر پووتین، سەرۆکی ڕووسیا لە ئەلاسکا کۆدەبنەوە.

لێدوانی فەرمی: کارۆلین لیڤیت، وتەبێژی کۆشکی سپی ڕایگەیاند، "تەنیا یەکێک لەو لایەنانەی بەشدارن لەم جەنگە لەوێ دەبن، بۆ ئەوەی ترەمپ تێگەیشتنێکی باشتر لە چۆنیەتی کۆتاییهێنان بەم جەنگە وەربگرێتەوە، بۆیە ئەمە تەنیا وەک "مەشقێکی گوێگرتنە بۆ سەرۆک''

کۆشکی سپی ئاماژەی بە ئەگەری کۆبوونەوەکانی داهاتووی ترەمپ و پووتین لە ڕووسیا کرد، هاوکات ڕەتیکردەوە هیچ لێدوانێک لەسەر دانوستانی نێوان ترەمپ و ڤۆلۆدێمیر زێلێنسکی، سەرۆکی ئۆکراینا بدات، ئەمەش لەکاتێکدایە کە پێشتر ترەمپ ئاماژەی بە ئەگەری بانگهێشتکردنی زێلێنسکی بۆ گفتوگۆکانی داهاتوو لەگەڵ پووتین کردبوو.