كۆمیسیۆن دڵنیایی لە جۆری کاغەزی دەنگدان دەدات "بە هیچ جۆرێک ناتوانرێت ساختە بکرێت"

ئاڤا نیوز

سەرۆکی تیمی ڕاگەیاندنی کۆمیسیۆنی باڵای سەربەخۆی هەڵبژاردنەكانی عێراق دڵنیایی لە جۆری کاغەزی دەنگدان دەدات و ئاماژە بۆ ئەوە دەکات، جۆری ئەو کاغەزەی بۆ دەنگدان ئامادەکراوە، هاوشێوەی کاغەزی دراوە، نە دەتوانرێت ساختە بکرێت و نە دەتوانرێت دەستکاری بکرێت.

وێنە گەورەکە: بڕیارە لە 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، ئامادەکارییەکان لەلایەن کۆمیسیۆنەوە بەردەوامە و بۆ کاغەزی دەنگدانیش کۆمیسیۆن پەنای بردووەتە بەر باشترین جۆرەکانی کاغەز تاوەکو نەتوانرێت دەستکاری بکرێت یاخود ساختە بکرێت.

لێدوانی فەرمی: عیماد جەمیل، سەرۆکی تیمی ڕاگەیاندنی کۆمیسیۆنی باڵای سەربەخۆی هەڵبژاردنەكانی عێراق بە ئاڤا میدیای ڕاگەیاند: جۆری کاغەزەکە ئەڵمانییە هەر لەوێش چاپ دەکرێت، هەمان پێکهاتەی کاغەزی دراوی هەیە و بە هیچ شێوەیەک ناتوانرێت ساختە بکرێت، ئامێرەکەش سیستمێکی ئەمنی تێدایە تەنیا ئەو جۆرە کاغەزە دەخوێنێتەوە.

سەبارەت بە دیزاینی کاغەزەکە و چەند دانەی لێ چاپ دەکرێت، عیماد جەمیل ئاماژەی بەوەدا، هێشتا دیزاینەکەی تەواو نەکراوە، دوای تەواوبوونی دیزاینەکەی و بەگوێرەی ژمارەی دەنگدەران کە 21 ملیۆن و 400 هەزار دەنگدەرە دەست بە چاپکردنی دەکرێت، هاوکات ژمارەیەکیش وەک کاغەزی یەدەگ چاپ دەکرێت، بەڵام هێشتا بڕیاری لەبارەوە نەدراوە.