داوای دوورخستنەوەی حەلبووسی لە هەڵبژاردنەکان دەکرێت

ئاڤا نیوز

لە هەنگاوێکی چاوەڕوانکراودا کە ململانێی سیاسیی نێو ماڵی سوننە قووڵتر دەکاتەوە، موسەننا سەمەڕائی، سەرۆکی هاوپەیمانیی عەزم، سکاڵایەکی فەرمی ئاراستەی کۆمیسیۆنی باڵای سەربەخۆی هەڵبژاردنەکانی عێراق کردووە و داوای دوورخستنەوەی محەممەد ڕێکان حەلبووسی، سەرۆکی پارتی تەقەدووم، لە هەڵبژاردنی داهاتووی پەرلەمان دەکات.

وێنە گەورەکە: بڕیارە لە 11-11- 2025، هەڵبژاردنی خولی شەشەمی ئەنجوومەنی نوێنەرانی عێراق بکرێت، لە چوارچێوەی ڕێکارەکانی بەر لە هەڵبژاردن، کۆمیسیۆن تاوەکو ئێستا ژمارەیەک کاندیدی بەهۆکاری جیا دوورخستووەتەوە.

بەڵگەنامەی فەرمی: بەگوێرەی ئەو بەڵگەنامانەی بەدەست ئاڤا میدیا گەیشتوون، سکاڵاکە ڕۆژی 12ـی ئاب بەفەرمی پێشکەش بە ئەنجوومەنی کۆمیسیاران کراوە. سامەڕائی لە سکاڵاکەیدا پشتی بە بڕیاری پێشووتری دادگای باڵای فیدراڵی ژمارە (9/فیدراڵی/2023) بەستووە، بەهۆیەوە ئەندامێتی حەلبووسی لە ئەنجوومەنی نوێنەران هەڵوەشێنرایەوە.

زانیاریی زیاتر: سامەڕائی لە سکاڵاکەدا ئاماژە بەوە دەکات کە بڕیارەکەی دادگای فیدراڵی سەلماندوویەتی، حەلبووسی مەرجە سەرەکییەکانی کاندیدبوونی لەدەست داوە، بەتایبەتی مەرجی "ڕەوشت و ناوبانگی باش" و "ئەمین و دەستپاک بوون" کە لە ماددەی (7/سێیەم)ی یاسای هەڵبژاردنەکاندا هاتووە.

لەلایەکی دیکەوە: بەگوێرەی بەڵگەنامەیەک کە لەلایەن کۆمیسیۆنەوە دەرچووە، ئاماژە بەوە دەکات، ئەوان وەرگرتنی (سکاڵایەک) پشتڕاست دەکەنەوە کە پێشکەش بە کۆمیسیۆنی باڵای سەربەخۆی هەڵبژاردنەکان کراوە لەلایەن موسەننا عەبدولسەمەد سامەڕائی، دژی سکاڵالێکراو (محەممەد ڕیکان حەدید).