داوا دەکرێت ڕێگری لە هاوردەکردنی تۆیۆتای چینی نەکرێت

ئاڤا نیوز

لە هەنگاوێکی گرنگدا بۆ پاراستنی کێبڕکێی بازرگانی، ئەنجوومەنی کاروباری کێبڕکێ و ڕێگری لە قۆرخکاری، داوایەکی فەرمی ئاڕاستەی دەستەی گشتیی گومرگ کردووە بۆ ڕاگرتنی کاتیی ئەو بڕیارەی کە مافی تایبەت دەداتە "کۆمپانیای تۆیۆتا عێراق" بۆ هاوردەکردنی ئۆتۆمبێلەکانی تۆیۆتا و براندەکانی دیکەی سەر بەو کۆمپانیایە.

چیرۆکی سەرەکی: دەستەی گشتیی گومرگی عێراق لە ڕێگەی گشتاندنێکی فەرمییەوە، کە ئاراستەی سەرجەم بنکە و بەشەکانی کردووە، بڕیارێکی تووندی دەرکردووە کە تێیدا هاوردەکردنی ئۆتۆمبێلی مارکەکانی تۆیۆتا، لێگزس و هینۆ سنووردار دەکات و تەنیا لە ڕێگەی بریکاری سەرەکییەوە ڕێگەی پێدەدات.

نووسراوی فەرمی: بەگوێرەی نووسراوێکی فەرمی کە واژۆی ئەحمەد یونس قاسم، سەرۆکی ئەنجوومەنەکەی لەسەرە و لە 13ـی ئابی 2025 دەرچووە، ئەنجوومەنەکە ئاماژەی بەوە کردووە کە سکاڵای لەلایەن کۆمپانیاکانی دیکەی هاوردەکردنی ئۆتۆمبێلەوە پێگەیشتووە سەبارەت بە بڕیارێکی پێشووتری گومرگ.

ئەوەی پێویستە بیزانیت: بڕیارەکە، کە لە 22ـی تەمموزی 2025 دەرچووە، ڕێگری لە هەر مامەڵەیەکی گومرگی دەکات بۆ ئۆتۆمبێلەکانی مارکەی (تۆیۆتا، لێگزس، هینۆ) ئەگەر لە ڕێگەی "کۆمپانیای تۆیۆتا عێراق"ـەوە هاوردە نەکرابن.

داواکاری فەرمی: ئەنجوومەنەکە جەختی کردووەتەوە کە "پێویستە کارکردن بەم بڕیارە بە شێوەیەکی کاتی ڕابگیرێت" چونکە پێچەوانەی یاسای کێبڕکێ و ڕێگری لە قۆرخکاری ژمارە (14)ـی ساڵی 2010ـیە "زیانێکی گەورەی بە توێژێکی فراوانی هاوردەکارانی ئۆتۆمبێل گەیاندووە."

لەلایەکی دیکەوە: ئەنجوومەنەکە داوای لە دەستەی گومرگ کردووە کە هەموو ئەو بەڵگەنامانەیان پێشکەش بکات کە بوونەتە هۆی دەرکردنی ئەو بڕیارە، بەمەبەستی لێکۆڵینەوە و وردبینی.