کۆمسیۆنی پرۆسەی ئاشتی لەگەڵ کەسوکاری گەریلا و سەربازە تورکە کوژراوەکان کۆدەبێتەوە

ئاڤا نیوز

کۆمیسیۆنی هاوپشتی نیشتمانی و برایەتی و دیموکراسیی پەرلەمانی تورکیا دوای سێیەمین کۆبوونەوەی خۆی کە دوێنێ سێشەممە بەڕێوەچوو، بڕیاریدا لە کۆبوونەوەی داهاتوودا لەگەڵ لایەنە زیانلێکەوتووەکانی شەڕ کۆببێتەوە.

چیرۆکی سەرەکی: ئامانجی سەرەکی کارەکانی کۆمیسیۆنەکە ئامادەکردنی بنەمایەکی یاساییە بۆ پرۆسەی ئاشتی. کۆمسیۆن کار بۆ چاکسازی و هەموارکردنەوەی هەندێک یاسا دەکات، بەتایبەتی بۆ دۆزینەوەی چوارچێوەی یاسایی کە ڕێگە بۆ چەکدانانی پەکەکە خۆش بکات.

بڵاوکراوەی فەرمی: بەگوێرەی میدیاکانی تورکیا، کۆمیسیۆنەکە بڕیاریداوە لە چوارەمین کۆبوونەوەی خۆیدا، کە لە بڕیارە ڕۆژانی 19 و 20ـی ئەم مانگەدا بکرێت، لەگەڵ بەشێک لە "دایکانی ئاشتی کە منداڵەکانیان چوونەتە شاخ، خێزانی ئەو سەربازانەی تورکیا کە لە شەڕی نێوان تورکیا و پەکەکەدا کوژراون، کۆببێتەوە.

زانیاریی زیاتر: بڕیارە ماهینوور ئۆزدێمیر گۆکتاش، وەزیری خێزان و کاروباری کۆمەڵایەتیی تورکیاش لەم کۆبوونەوەیەدا بەشداری بکات.