تاوەكو ئێستا زیاتر لە 11 هەزار كەس ناویان بۆ حەجی ئەمساڵ تۆمار كردووە

ئاڤا نیوز

پرۆسەی تۆماركردنی ناوی حاجییان بۆ حەجی ساڵی داهاتوو بەردەوامە و لە ماوەی تەنیا چوار ڕۆژدا زیاتر لە 11 هەزار كەس لە ڕێگەی سیستمێكی ئەلیكرۆنییەوە فۆڕمی پێشكەش كردووە و بەرپرسێكی وەزارەتی ئەوقافیش دەڵێت، سیستمەكە هیچ ساختەكاری و واستەیەك قبوڵ ناكات.

چیرۆکی سەرەکی: وەزارەتی ئەوقاف ماڵپەڕی "دەروازەی حەج"ـی بۆ تۆماری ساڵانەی حاجییان لە پرۆسەی حەج ڕاگەیاند، بەم شێوەیە حاجییان دەتوانن بەشێوەی ئەلیکترۆنی و بەبی بەرامبەر خۆیان بۆ پرۆسەی حەج ناونووس بکەن.

لێدوانی فەرمی: كاروان ستوونی، گوتەبێژی بەڕێوەبەرایەتیی حەج و عومرەی كوردستان بە ئاڤا میدیای ڕاگەیاند: پرۆسەی تۆماركردنی خوازیارانی حەج لە هەرێمی كوردستان بەردەوامە و تاوەكو ئێستا زیاتر لە 11 هەزار كەس داواكاری لە ڕێگەی سیستمە تازەكەوە پێشكەش كردووە.

کاروان ستوونی وتیشی، ماوەی سێ ساڵە لەگەڵ فەرمانگەی تەكنەلۆژیای زانیاری لەسەر هێڵین و ئەمساڵ سیستمێكمان بۆ خۆتۆماركردنی خوازیارانی حەج داناوە كە لە عێراق هاوشێوەی نییە و هیچ بوارێك بە ساختەكاری و واستە نادات، لەو سیستمە هیچ كەسێك ناتوانێت ناوی دووبارە بنووسێت تەنانەت لە تیروپشكەكەش هیچ كەسێك ناتوانێت دەستكاری بكات.

زانیاریی زیاتر: ساڵی ڕابردوو، پشكی هەرێمی كوردستان بۆ حەج، پێنج هەزار و 134 كەس بوو، بەپێی گوتەی بەرپرسانی وەزارەتی ئەوقاف ئەمساڵ عێراق بەنیازە پشكەكە زیاد بكات.

ئەوەی پێویستە بیزانیت: ڕۆژی 2025-08-10، پشتیوان سادق، وەزیری ئەوقاف، لە كۆنفڕانسێكی ڕۆژنامەوانیدا دەستپێكردنی پرۆسەی ناوتۆماركردنی بۆ حەجی ساڵی داهاتوو ڕاگەیاند و شێوازی ناونووسینی خوازیارانی حەجی ڕوون كردەوە و وا بڕیارە لە 2025-10-01، تیروپشكی ناوەكان بەڕێوە بچێت.

وردەكاری پرۆسەكە: خوازیار سەرەتا سەردانی لینکی ماڵپەڕی 'دەروازەی حەج' دەكات كە بە ژمارەی هێڵی تەلەفۆنەكەی دەچیتە ژوورەوە، کۆدێکی شەش ژمارەیی بۆ دێت و وەک خۆی لەسەر ماڵپەڕەكە دەینووسێتەوە، کە ژمارەکە قبوڵ کرا، دەپرسێت ئایا هاووڵاتی ئاسایی، یان کۆمپانیا و مامۆستای ئایینی و دەتەوێت ببیتە ڕێبەر، ئایا پیاویت و بە تەنیا دەچیتە حەج یان ئافرەتی، یان ئافرەتی و لەگەڵ مەحرەم دەچیت. دواتر لەسەر ماڵپەڕەکە زانیارییەکانی نیشتەجێبوون بەپێی کارتی زانیاری و پارێزگا لە پێشکەشکار دەپرسێت. زمانی پەیوەندیش لە ماڵپەڕەكە بەردەستە. لە کۆتا هەنگاوی خۆتۆمارکردنەکە، دەچێتە سەر پێناسی دیجیتاڵی، زانیارییە کەسییەکان، ژمارەی مۆبایل و وردەکاریی پاسپۆرت، دواتر وێنەیەکی ڕووخسار لەسەر سایتەکە هاوپێچ دەکرێت، لەگەڵ ڕووی پێشەوە و دواوەی کارتی نیشتمانی، دواتر ڕووی پێشەوە و دواوەی کارتی زانیاری هاوپێچ دەکرێت.