ئەو کچەی لە ڕێکلامێک بەنزینی دەڕشت، ئاسایش دەستگیری کرد

ئاڤا نیوز

ئەمڕۆ پێنجشەممە ئاسایشی هەولێر ئەو ئافرەتەی دەستگیرکرد کە ڕێکلام بۆ بەنزیخانەیەک دەکات و بەنزین دەڕێژێت.

چیرۆکی سەرەکی: لەماوەی دوو ڕۆژی ڕابردوودا ڤیدیۆی ڕێکلامێک ناڕەزایی زۆری دروست کرد. لە ڤیدیۆکە کچێک پەپمی بەنزینی لەدەستە و بەنزین دەڕێژێت و وەکو توانج چەند قسەیەک دەکات. دوای بڵاوبوونەوەی ڤیدیۆکە ناڕەزایی زۆری لێکەوتەوە. بەبڕیاری قایمقامیەت بەنزیخانەکە داخرا و بڕیاری دەستگیرکردن بۆ ئافرەتەکە دەرچوو.

ڕاگەیێنراوی فەرمی: بەڕێوەبەرایەتیی ئاسایشی هەولێر ڕایگەیاند، بەفەرمانی دادوەری لێکۆڵینەوەی ئاسایشی هەولێر، بە هەماهەنگی لەگەڵ قایمەقامیەتی قەزای ناوەندی هەولێر، تۆمەتبارێکی ئافرەت بەناوی (س ، د ، م)ـمان دەستگیر کرد.

لە بەشێکی دیکەی ڕاگەیێنراوەکە هاتووە، ئەو ئافرەتە هەڵساوە بە بڵاوکردنەوەی گرتە ڤێدیۆیەک لە تۆڕەکۆمەڵایەتییەکان بەمەبەستی ڕێکلامی بازرگانی بۆ وێستگەیەکی بەنزین لە شاری هەولێر، بۆیە بە پێی ماددەی دووەمی یاسای ژمارە شەشی ساڵی 2008 خراپ بەکارهێنانی ئامێرەکانی پەیوەندی دەستگیرکراوە.

بەڕێوەبەرایەتیی ئاسایشی هەولێر ئەوەش دەڵێت، گرتە ڤیدیۆکە ناڕەزایەتیی هاووڵاتیان و ڕای گشتی لێکەوتەوە، هاوکات ڕێکاری یاسایی بەرامبەر بەنزیخانەکەش گیرایەبەر و داخراوە.