داواکارییەکان بۆ دوورخستنەوەی حەلبووسی لە هەڵبژاردن فراوانتر دەبن

ئاڤا نیوز

دوای ئەوەی سەرۆکی هاوپەیمانیی عەزم، سکاڵایەکی فەرمیی پێشکەش بە کۆمسیۆنی هەڵبژاردنەکان کرد و داوای دوورخستنەوەی حەلبووسی لە هەڵبژاردنی داهاتووی پەرلەمان کرد، بازنەی ناڕەزایەتییەکان و داواکارییەکان بۆ دوورخستنەوەی محەممەد حەلبووسی، سەرۆکی پارتی تەقەدووم فراوانتر بوونە و ڕەخنەکانیش لە چاوپۆشی کۆمیسیۆن زیادی کردووە.

بەڵگە: بەگوێرەی بەڵگەنامەیەک کە دەست ئاڤا میدیا کەوتووە، موسەنا سامەڕایی لە سکاڵاکەیدا حەلبووسی بە بەهەدەردانی سامانی گشتی و بەکارهێنانی پۆستەکەی بۆ بەدەستهێنانی بەرژەوەندیی کەسی و حیزبی تۆمەتبار دەکات، هاوکات چەندین سکاڵای دیکەش لەلایەن هەریەک لە جەمال کەربوولی، سەرۆکی حیزبی حەل، لەیس دلێمی و حەیدەر مولا، پەرلەمانتارانی پێشوو پێشکەش کراون و هەموویان داوای دوورخستنەوەی حەلبووسی دەکەن لە کێبڕکێی هەڵبژاردن.

لێدوانی تایبەت:  عیزەدین عەلی سلێمان، ئەندامی ئەنجوومەنی خێڵەکانی ئەنبار بەئاڤا میدیای ڕاگەیاند: بەپێی یاسای هەڵبژاردنی ژمارە نۆی ساڵی 2020ـی هەموارکراو، کاندیدی پەرلەمان دەبێت خاوەن ڕەوشتێکی باش بێت و بە تاوانێکی گەورە یان کەتنێکی شەرەف و ئەمانەت یان گەندەڵی دارایی سزا نەدرابێت و بەشێکیش لەم مەرجانە حەلبووسی دەگرێتەوە.

لەلایەکی دیکەوە: عاید شەمەری، ئەندامی هاوپەیمانیی عەزم، بەئاڤا میدیای گوت، ئەو سکاڵایەی سامەڕایی پێشکەشی دادگای فیدراڵیی کردووە، پەیوەستە بە دوورخستنەوەی حەلبووسی لە پەرلەمان، بۆ ئەوەی بۆ هەموو لایەک ڕوونبێتەوە ئایا ئەم بڕیارە هەمیشەییە یان تەنیا ئەم خولەی ئێستای پەرلەمان دەگرێتەوە و کۆمسیۆنی هەڵبژاردنەکانیش سوود لەم ڕوونکردنەوەیە وەردەگرێت.

به‌ته‌نیشت ئه‌م بابه‌ته‌وه‌: حەلبووسی لە میانەی سەردانەکەی ئەم دواییەی بۆ هەریەکە لە پارێزگای ئەنبار و کەرکووک و بەغدا، زنجیرەیەک تۆمەتی ئاراستەی نەیارەکانی لەپێکهاتەی سوننە کرد و بە خیانەت و وێرانکردنی سوننە تۆمەتباری کردن.

ئەوەی پێویستە بیزانیت: بڕیارە 11-11-2025، هەڵبژاردنی پەرلەمانی عێراق بکرێت، بۆ ئەم مەبەستە کۆمسیۆن بەپێی خشتەی ئامادەکارییەکانی هەڵبژاردن، دەستی بە جێبەجێکردنی ڕێکار و ئامادەکارییەکان کردووە.