لە سۆران خولی "وەڵامدەرەوەی کۆمەڵگە" بەشێوازی ئۆتۆمبێلی گەڕۆک بەڕێوە چوو

ئاڤا نیوز

لە چوارچێوەی پەرەپێدانی سیستمی وەڵامدانەوەی خێرای قەیران و کارەسات و بەرزکردنەوەی توانای وەڵامدانەوە، بۆ یەکەمجار خولی "وەڵامدەرەوەی کۆمەڵگە" بەشێوازی ئۆتۆمبێلی گەڕۆک، لە ئیدارەی سەربەخۆی سۆران بەڕێوە چوو.

وێنە گەورەکە: وەزارەتی ناوخۆی هەرێمی کوردستان، بەهەماهەنگی لەگەڵ ناوەندی هاوبەشی هەماهەنگیی قەیرانەکان JCC، بە هاوبەشی لەگەڵ ئاژانسی فیدڕاڵیی ئەڵمانی بۆ هاوکاریی تەکنیکی سەر بە وەزارەتی ناوخۆی ئەڵمانیا، هەڵمەتی بەرەوپێشبردنی سیستمی وەڵامدانەوەی قەیران و کارەسات لە هەرێمی کوردستان ئەنجام دەدات، لەپێناو بەرزکردنەوەی توانای وەڵامدانەوەی خێرا بۆ ڕووداوەکان.

چیرۆکی سەرەکی: زانکۆی سۆران بۆ یەکەمجار هەڵسا بە ڕێکخستنی خولی "وەڵامدەرەوەی کۆمەڵگە ـ Community Responder"، بەشێوازی ئۆتۆمبێلی گەڕۆک، دوای تەواوبوونی خولەکەش بە ئامادەبوونی حەکیم تێلی، جێگری سەرپەرشتیاری ئیدارەی سەربەخۆی سۆران و بەڕێوەبەری بەڕێوبەرایەتیی کۆچ و کۆچبەران و وەڵامدانەوەی قەیرانەکانی ئیدارەی سەربەخۆی سۆران، بڕوانامە بەسەر بەشداربووان دابەش کرا.

ڕاگەیێنراوی فەرمی: بەپێی بڵاوکراوەی بەشی ڕاگەیاندنی ئیدارەی سەربەخۆی سۆران، خولەکە بۆ ماوەی چوار ڕۆژ بەردەوام بوو، کۆمەڵێک خۆبەخش و فەرمانبەری ئیدارەی سەربەخۆی سۆران و سەرۆکایەتیی زانکۆی سۆران و کۆلێژی تەکنیکیی سۆران بەشدار بوون؛ کە تیایدا بەشداربووان، ئەزموونی کارکردنیان لەبواری چۆنیەتیی وەڵامدانەوە و بەهاناوەچوون لە کاتی ڕووداوە نەخوازراوەکاندا دەوڵەمەند کرد و، ئاشنابوون به چۆنیەتیی ئەنجامدانی بەهاناوەچوونی خێرا، ڕزگارکردن و وەڵامدانەوە، چۆنیەتیی ئەنجامدانی فریاگوزاریی سەرەتایی و چەندین بابەتی دیکە.