پەیامێک لە یەکێتییەوە بۆ پارتی لەبارەی مووچە و پێکهێنانی حکومەت

ئاڤا نیوز

بەبۆنەی ساڵیادی دامەزراندنی پارتی دیموکراتی کوردستان، مەکتەبی سیاسی یەکێتیی نیشتیمانی کوردستان پەیامی پیرۆزبایی ئاراستەی سەرکردایەتی پارتی ئەندام و لایەنگرانی دەکات و ڕایدەگەیەنێت: تەئكید لەسەر پێویستی یەكڕیزی هێزە سیاسییەكانی كوردستان، بە تایبەتیش یەكێتی و پارتی، دەكەینەوە لە پێناوی پێكهێنانی حكومەتێكی پتەو و کار. 

ڕاگەیێنراوی فەرمی: مەكتەبی سیاسیی یەكێتیی نیشتمانیی كوردستان، ڕایگەیاند، بەڕێزان مەكتەبی سیاسیی پارتی دیموكراتی كوردستان، بە بۆنەی تێپەڕبوونی 79 ساڵ بەسەر دامەزراندنی پارتی دیموكراتی كوردستانەوە گەرمترین پیرۆزبایی ئاراستەی ئێوە و ئەندام و لایەنگرانی پارتی دەكەین.

بەم بۆنەیەوە تەئكید لەسەر پێویستی یەكڕیزی هێزە سیاسییەكانی كوردستان، بە تایبەتیش یەكێتی و پارتی، دەكەینەوە لە پێناوی پێكهێنانی حكومەتێكی پتەو و كارا كە ئەركی چاكسازی و راستكردنەوەی رێڕەوی حوكمڕانی بگرێتە ئەستۆ لە رێی سەرخستنی ویستی گەلەكەمان لە دابینكردنی ماف و ئیستحاقە دەستوورییەكانی لە عیراق، بە تایبەتیش مووچە و شایستە داراییەكانیان، لەسەروبەندی هەڵبژاردنی داهاتووی ئەنجوومەنی نوێنەراندا.

باکگراوند: پارتی دیموکراتی کوردستان، لە 16ـی ئابی 1946 دامەزراوە، سەرەتا ناوی (پارتی دیموکراتی کورد) بوو و پاشان لە کۆنگرەی سێیەمی حیزبەکە، شەش ساڵ دوای دامەزرانی، بڕیاردرا ناوی حیزبەکە بکرێتە (پارتی دیموکراتی کوردستان) ئەوکات و ئێستاش دوای 79 ساڵ پارتی هێشتا حیزبی یەکەمە لە هەرێمی کوردستان، هاوکات لە گۆڕەپانی سیاسی عێراقیش حیزبێکی بەهێز و کاریگەرە بۆ یەکلاکردنەوەی زۆرینەی پرسە سیاسییەکان.