لە مووسڵ پرۆسەی هەڵدانەوەی گەورەترین زنجیرە گۆڕی بەکۆمەڵ دەستپێدەکات

ئاڤا نیوز

سەرلەبەیانی ئەمڕۆ یەکشەممە لە ناوچەی خەسفەی باشووری مووسڵ، پرۆسەی هەڵدانەوەی گەورەترین زنجیرە گۆڕی بەکۆمەڵ دەستیپێکرد، کە ڕووفاتی زیاتر لە 20 هەزار کەسی تێدایە و لەسەردەمی داعش گولـلەبارانکراون.

چیرۆکی سەرەکی: بەپێی ڕاپۆرتێکی نەتەوە یەکگرتووەکان کە لە تشرینی دووەمی 2018 بڵاوکرایەوە، زیاتر لە 200 گۆڕی بەکۆمەڵ هەن کە پاشماوەی زیاتر لە 12 هەزار ڕووفاتیان تێدايە لەو ناوچانەی کە پێشتر لەلایەن داعشەوە کۆنترۆڵکرابوون لە عێراق، لەوانەش لە پارێزگاکانی نەینەوا، کەرکووک، سەڵاحەددین و ئەنبار.

لێدوانی فەرمی: عەبدولقادر دەخیل، پارێزگاری نەینەوا لە ڕێوڕەسمی هەڵدانەوەی یەکەم گۆڕی بە کۆمەڵ لە چوارچێوەی زنجیرە گۆڕە بەکۆمەڵەکانی ناوچەی خەسفەی باشووری مووسڵ ڕایگەیاند، لەو زنجیرە گۆڕە بە کۆمەڵانەدا 20 هەزار کەس لە پێکهاتەی نەتەوەیی وئاینیی جیاواز کوژراون، لە یەک ڕۆژیشدا دوو هەزار کەس لە خەڵکی مووسڵ لەسەر دەستی "تیرۆر" کوژراون.

وتیشی، بەهاوکاری لایەنە پەیوەندییدارەکان کار بۆ ناسینەوەی هەموو ڕووفاتەکان دەکەن، لەو ناوچەیەشدا کار بۆ دروستکردنی مۆنۆمێنتێک دەکەن بۆ بە زیندوویی هێشتنەوەی یادگاریی قوربانییەکان و ئەو تاوانە دڕندەیە کە وەک برینێک بە جەستەی مووسڵدا دەمێنێتەوە.