ئیسرائیل ژێرخانی وزەی حووسییەکان دەکاتە ئامانج

ئاڤا نیوز

 

هێزی دەریایی سوپای ئیسرائیل ڕایگەیاند، وێستگەیەکی کارەبایان لە سەنعا و کەمپی حەفا لە چیای نوقم لە یەمەن بۆردوومان کرد.

 

چی ڕوودەدات: ڕۆژی یەکشەممە 17-8-2025، هێزی  دەریایی سوپای ئیسرائیل ژێرخانی وزەی حووسییەکانیان لە وێستگەی کارەبای حەزیز لە باشووری سەنعا بۆردوومان کردووە و هێرشەکە بۆ سەر ژێرخانی وزەی حوسییەکان بە بەلەمی مووشەک بارکراو ئەنجام دراوە.

 

بڵاوکراوەی فەرمی: سوپای ئیسرائیل لە بەیاننامەیەکدا هێرشەکەی بۆ سەر حووسییەکان پشڕاست کردەوە و ڕایگەیاند: هێرشەکە نزیکەی دوو هەزار کیلۆمەتر لە کەناراوەکانی ئیسرائیلەوە بۆ ناو قووڵایی یەمەن ئەنجامدراوە و ژێرخانی وزەیان کردووەتە ئامانج کە حووسییەکان بەکاریدەهێنن.

 

بۆچوونی لایەنی بەرامبەر: حەزام ئەسەد، ئەندامی مەکتەبی سیاسیی حووسییەکان دوای هێرشەکەی ئیسرائیل، ڕایگەیاند: "ئیسرائیل تەنیا پەلاماری دامەزراوە خزمەتگوزارییەکان و شوێنە مەدەنییەکان وەک وێستگەی کارەبا، ئاو دەدات."