ئەحمەد شەرع: دابەشكردنی سووریا خەونە

ئاڤا نیوز

 

سەرۆکی سووریا دووپاتی کردەوە، بەهیچ شێوەیەک ڕێگە  بە دابەشبوونی سووریا نادات و هەموو هەوڵە ناوخۆیی و دەرەکییەکان بۆ دابەشکردنی سووریا شکستپێدەهێنن.

 

وێنە گەورەکە: دوای ئەوەی ڕۆژی شەممە 16-8-2025، سەدان کەس لە ناوەندی شاری سوەیدای باشووری سووریا لە ژێر ناونیشانی "مافی چارەنووس" خۆپیشاندانیان سازکرد و ڕایانگەیاند، ئەوان بە ناناوەندی دەسەڵات و ئیدارەی خۆسەرییش ڕازی نین و، داوای جیابوونەوەی تەواوەتیان لە سووریا کرد، ئەمەش کاردانەوەی شەرعی بەدوای خۆیدا هێنا و هەوڵەکەی بە "خەون" وەسف کرد.
 

لێدوانی فەرمی:  ئەحمەد شەرع، سەرۆکی سووریا ڕایگەیاند: "ئەوەی داوای دابەشکردنی سووریا دەکات، نەزانینی سیاسی هەیە و خەون دەبینێت، زۆربەی کاتەکانیش ئەوانەی زۆر بیر لە خەونەکانیان دەکەنەوە وایان لێدەکات خۆیان بکوژێت".

سەرۆکی سووریا دڵنیایی دەدات کە، "هیچ مەترسییەک بۆ دابەشکردنی سووریا نییە، لە نێو هەندێک کەسدا خواست هەیە بۆ دابەشکردنی و بە هەوڵدان بە دانانی کانتۆنی ناوخۆیی، بەڵام لەڕووی لۆژیکی و سیاسی و نەتەوەیی و کولتوورییەوە ئەمە مەحاڵە".