ئاگرەکەی سنووری بانەی ڕۆژهەڵاتی کوردستان باخەکانی پێنجوێن دەسووتێنێت

ئاڤا نیوز

 

ئەو ئاگرەی شەوی ڕابردوو لە سنووری شاری بانەی ڕۆژهەڵاتی کوردستان کەتووتەوە تا ئێستا کۆنترۆڵ نەکراوە و مەترسی سووتانی لەسەر ڕەز و باخەکانی گوندی سیاگوێزی سنووری پێنجوێن دروست کردووە.

 

چیرۆکی سەرەکی: کاتژمێر 9ی شەوی ڕابردوو ئاگرێکی گەورە لە گوندی چەمپاراو لە سنووری بانە لە ڕۆژهەڵاتی کوردستان کەوتەوە، ئاگرەکە تائێستا کۆنترۆڵ نەکراوە و تەشەنەی کردووە و گەیشتووەتە سنووری گوندی سیاگوێز لە سنووری قەزای پێنجوێن لە باشووری کوردستان.

 

زانیاریی بەدەستهاتوو: ئاگرەکە گەیشتووەتە گوندی سیاگوێز و مەترسی سووتانی لەسەر ڕەز و باخی جووتیاران دروست کردووە و خەڵکی گوندەکە لە هەوڵی کۆنترۆڵ کردنی ئاگرەکەن.

 

هۆکارە زانراوەکان: بەشێکی ئەو شوێنەی ئاگرەکەی لێکەوتووەتەوە ناوچەی سنوورییە و خەڵکی هەردوو گوندی چەمپاراو و سیاگوێز ناتوانن لەو شوێنە هەوڵی کۆنترۆڵ کردنی بدەن، هەندێ شوێنیش مین و پاشماوەی جەنگی لێیە و کۆنترۆڵ کردنی ئاگرەکەی سەختتر کردووە.

 

ئەمەش بزانە: سیاگوێز دەکەوێتە سنووری ناحیەی گەرمک لە قەزای پێنجوێن، گوندەکە پڕیەتی لە کانیاو و ئاوی سازگار، ئەو گوندە لە هەرچوارلاوە بە دارستان و ڕەز و باخ داپۆشراوە، گوندەکە چوار وەرزە دیمەنێکی جوان و دڵڕفێنی هەیە، ساڵانە ژمارەیەکی زۆر گەشتیار ڕووی تێدەکەن.