پێکهاتەی تورکمان داوای وەزارەتێکی خزمەتگوزاریی دەکات

ئاڤا نیوز

پارتی چاکسازیی تورکمانی بەشداریكردنی پێكهاتەی توركمان لە كابینەی نوێی حكومەتی هەرێمی كوردستان دووپات دەكاتەوە، هاوكات بە پێویستی دەزانێت دانیشتنەكانی پەرلەمانی كوردستان لەنزیكترین كاتدا دەستپێبكاتەوە.

وێنە گەورەكە: ڕۆژی 14ـی ئابی 2025، لە شاری هەولێر، هەردوو شاندی دانووستانکاری پارتی و یەکێتی کۆبوونەوە و لە ڕاگەیەنراوێکی هاوبەشدا، ئاماژەیان بەوە کرد، پێویستە لە مانگی داهاتوو پەرلەمانی کوردستان دەستبەکارەکانی بکاتەوە كە لەوەتەی 2ـی كانوونی یەكەمی ساڵی ڕابردووەوە، دانیشتنەكانی هەڵگیراوە.

لێدوانی فەرمی: مونا قەهوەچی، جێگری سەرۆكی پارتی چاكسازیی توركمان تایبەت بە ئاڤای وت، "وەك پێكهاتەی توركمان ئەمجارە داوای پۆستی سكرتێری پەرلەمان ناكەین، بەڵكو داوای وەزارەتێكی خزمەتگوزاریی یان داوای وەزارەتی ڕۆشنبیری و لاوان دەکەین".

مونا قەهوەچی، ڕاشیگەیاند، پێویستە پەرلەمانی كوردستان لە كاتێكی نزیكدا دەست بە كارەكانی بكاتەوە چونكە ئەوە خواستێكی نێودەوڵەتیشە، هەركاتێكیش ڕێككەوتن لەنێوان لایەنە سیاسییەكان كرا، بە زووترین كات دەستەی سەرۆكایەتیی پەرلەمان هەڵدەبژێردرێت.

زانیاریی زیاتر: جێگری سەرۆکی پارتی چاکسازیی تورکمان ئاماژەی بەوەشكرد، پێكهاتەی توركمان بەشداریكردنی لە حكومەتی نوێ بە مافی خۆی دەزانێت و بەفەرمیش داواكاری بۆ وەرگرتنی وەزارەتێكی خزمەتگوزاری پێشكەش كردووە.