فوئاد حوسێن و باڵیۆزی ئەمریکا تاوتوێی هەناردەکردنی نەوتی هەرێمی کوردستان دەکەن

ئاڤا نیوز

بابەتی هەناردەکردنەوەی نەوتی هەرێمی کوردستان یەکێک بووە لە تەورە سەرەکییەکانی کۆبوونەوەی نێوان د.فوئاد حوسێن، جێگری سەرۆکوەزیرانی عێراق و باڵیۆزی ئەمریکا لە عێراق.

چیرۆکی سەرەکی: رۆژی یەکشەممە، فوئاد حوسێن، جێگری سەرۆکوەزیرانی عێراق و وەزیری دەرەوەی عێراق پێشوازیی لە ستیڤن ڤەیگن، هەڵسوڕێنەری کاروباری باڵیۆزخانەی ئەمریکا لە عێراق کرد، پرسی کارکردنی کۆمپانیا ئەمریکی و بیانییەکانی کارکەر لە بواری نەوت لە عێراق و هەرێمی کوردستان و هەناردەکردنی نەوتی هەرێمی کوردستان تەوەری سەرەکیی کۆبوونەوەکەیان بووە.

ڕاگەیێنراوی فەرمی: وەزارەتی دەرەوەی عێراق ڕایگەیاند: لە میانی دیدارەکەدا هەردوولا باسیان لە پەیوەندییە دووقۆڵییەکانی نێوان عێراق و ئەمریکا کرد، بەتایبەتی سەبارەت بە ڕۆڵی کۆمپانیا نەوتییە ئەمریکییەکان کە لە عێراقدا کاردەکەن.

هەروەها باس لە کێشە هەڵپەسێردراوەکانی نێوان کۆمپانیا نەوتییەکان کرا کە لە هەرێمی کوردستان کاردەکەن و ڕێگاکانی چارەسەرکردنیان بۆ ئەوەی بتوانرێت هەناردەکردنی نەوت لە کێڵگە نەوتییەکانی هەرێمەوە دەستپێبکاتەوە.

لەلایەکی دیکەوە: لە بەشێکی دیکەی دیدارەکە هەردوولا گفتوگۆیان لەسەر گۆڕانکارییەکانی ناوچەکە کردووە، باڵیۆز ڤەیگن پێداچوونەوەی بە هەڵوێستی حکومەتی ئەمریکا سەبارەت بە پێشهاتەکانی ڕۆژهەڵاتی ناوەڕاست کرد.