بزووتنەوەی نوجەبا: زانیارییمان هەیە هێرش دەکرێتە سەر عێراق

ئاڤا نیوز

بەرپرسێکی باڵای بزووتنەی نوجەبا کە گرووپێکی چەکدارییە و نزیکە لە ئێران ڕایگەیاند: بە پلانی ئەمریکا و ئیسرائیل هەوڵدەدرێت گرووپەکانی بەرەی مقاوەمە چەک بکرێن و زانیاریی هەیە کە عێراق بە ئامانج دەگیرێت.

وێنە گەورەکە: تادێت فشارە نێودەوڵەتییەکان لەسەر حکومەتی عێراق زیاتر دەبن بۆ چەکداماڵینی ئەو گرووپە چەکدارانەی سەر بە ئێرانن، لەبەرامبەردا ئێران و ئەو گرووپانە پێداگیرن لەسەر بەدەستەوەنەدانی چەک، ئەمەش ئەگەری هێرشکردنە سەر ئەو گرووپانە لەلایەن ئەمریکاوە زیاتر دەکات.

لێدوانی فەرمی: مەهدی کەعبی، ئەندامی مەکتەبی سیاسیی بزووتنەوەی نوجەبا لە چاوپێکەوتنێکی تەلەڤزیۆنی ڕایگەیاند: دەبینین زلهێزە جیهانییەکان و ئەو وڵاتانەی پەیوەندییەکانیان لەگەڵ ئیسرائیل ئاسایی کردووەتەوە، هەر یەکە لە ئێران، عێراق و لوبنان دەکەنە ئامانج. "دوژمن" لە لوبنان و عێراق بە هەماهەنگی هەنگاو دەنێن و پلانەکانیان بۆ چەکداماڵینی بەرەی مقاوەمەیە، کە ئەمە پڕۆژەی ئەمریکایە بۆ ملکەچکردنی بەرەی مقاوەمە.

ناوبراو وتیشی: ئێمە هاوپەیمانی کۆماری ئیسلامیی ئێرانین و بە هاوپەیمانییەکی متمانەپێکراو دایدەنێین، پێم وایە ئەو یاداشتە لێکتێگەیشتنەی نێوان عێراق و ئێران لەم دواییە سەبارەت بە ئاسایشی سنووری واژۆ کرا، جێبەجێ ناکرێت.

کەعبی ئاماژەی بەوەشکرد، "زانیاریی هەیە کە عێراق دەکرێتە ئامانج و ئەمەش دەکرێت لە هەر ساتێکدا ڕووبدات."