وێڕای هۆشداریی ئەمریکا، هێزە شیعەکان سوورن لەسەر تێپەڕاندنی یاسای حەشدی شەعبی

ئاڤا نیوز

سەرەڕای هۆشدارییەکانی ئەمریکا سەبارەت بە تێپەڕاندنی یاسای حەشدی شەعبی، زۆربەی لایەنە شیعەکان جەخت دەکەنەوە کە لە ماوەی چەند ڕۆژی داهاتوودا دەنگ لەسەر پڕۆژەیاساکە دەدەن.

چیرۆکی سەرەکی: بەپێی لێدوانی پەرلەمانتارانی شیعە، هەرچەندە پەرلەمانی عێراق دوو خوێندنەوەی بۆ پڕۆژەیاساکە کردبوو، بەڵام حکومەت پڕۆژەیاساکەی کێشایەوە، هۆکاری کشانەوەکەش چەند کەلێنێکی یاسایی بوو و چارەسەر کرا.

 
لێدوانی فەرمی:  هادی عامری، سەرۆکی هاوپەیمانیی فەتح، ڕایگەیاند: پەرلەمان لەبەردەم تاقیکردنەوە و ئاڵنگارییەکی مێژوویی گەورەدایە بۆ پەسەندکردنی یاسای حەشدی شەعبی، دوور لە هەر کاریگەرییەکی ناوخۆیی و دەرەکی،  وەک وەفایەکیش، بە جلی سەربازیی حەشدەوە دەچینە ناو پەرلەمان.

زانیاریی زیاتر: سەبارەت بەو پەرلەمانتارانەی کە پابەندی ئەم بانگەوازە دەبن، مستەفا سەنەد، پەرلەمانتاری عێراقی، ئاشکرای کرد نزیکەی 100 پەرلەمانتار بە جلی حەشدەوە دەچنە نێو هۆڵی پەرلەمان و هیچ پەرلەمانتارێکی سوننەیان تێدا نییە، ئەمە لە کاتێکدایە کە نزیکەی 35 هەزار چەکداری سوننە لە ڕیزەکانی حەشدی شەعبیدا تۆمارکراون.

ئەوەی پێویستە بیزانیت: بە پەسەندکردنی پڕۆژە یاسای حەشدی شەعبی، زیاتر لە چوار هەزار چەکدار و بەرپرسی حەشد خانەنشین دەکرێن، بەشێک لەوانە سەرکردە باڵاکانی حەشدی شەعبین.