حەماس ڕازی بوو بە ڕاگرتنی شەڕ لە غەززە

ئاڤا نیوز

سەرچاوەیەک لە بزووتنەوەی حەماس ڕاگەیاند، حەماس ڕەزامەندییان لەسەر پێشنیازێکی نوێ بۆ ئاگربەست لە کەرتی غەززە نیشانداوە، کە زیاتر لە 22 مانگە بەهۆی شەڕی نێوان ئەو حەماس و ئیسرائیلەوە وێران بووە.

وێنە گەورەکە: هەوڵە دیپلۆماسییەکان بە نێوەندگیریی قەتەر، میسر و ئەمریکا چڕبوونەتەوە بۆ گەیشتن بە ڕێککەوتنێک کە کۆتایی بەو شەڕە خوێناوییە بهێنێت. پێشنیازە نوێیەکان ئاگربەستێکی 60 ڕۆژە لەخۆدەگرن، کە لەو ماوەیەدا حەماس هەندێک لە بارمتە ئیسرائیلییەکان ئازاد دەکات، لە بەرامبەر ئازادکردنی ژمارەیەکی زۆر لە زیندانیانی فەڵەستینی لەلایەن ئیسرائیلەوە.

زانیاریی بەدەستهاتوو: سەرچاوەیەک کە نەیویست ناوی ئاشکرا بکرێت، بە ئاژانسی فرانس پرێسی ڕاگەیاند، حەماس وەڵامی خۆی گەیاندووەتە نێوەندگیرەکان و پشتڕاستی کردووەتەوە بەبێ داواکردنی هیچ هەموارکردنەوەیەک، ڕەزامەندن لەسەر پێشنیازی ئاگربەستی نوێ.

پێشتر لە هەمان ڕۆژدا، بەرپرسێکی فەڵەستینی بە فرانس پرێسی وتبوو کە نێوەندگیرەکان پێشنیازی ئاگربەستێکی سەرەتایی بۆ ماوەی 60 ڕۆژ و ئازادکردنی بارمتەکانیان لە دوو قۆناغدا کردووە.

زانیاریی زیاتر: سەرچاوەکان باس لەوەدەکەن، میسر و قەتەر داوایان لە ستیڤ ویتکۆف نوێنەری ئەمریکا بۆ ڕۆژهەڵاتی ناوەڕاست کردووە سەردانی قاهیرەی پایتەختی میسر بکات و ڕێکارەکانی پێشنیازەکە تەواو بکرێن.

ئەوەی پێشبینی دەکرێت: چاوەڕوان دەکرێت لە چەند ڕۆژی داهاتوودا وەڵامی فەرمی ئیسرائیل بۆ ئەم پێشنیازە نوێیە ڕوون ببێتەوە، کە دیاری دەکات ئایا ئەم هەوڵە نوێیە دەتوانێت ببێتە هۆی ڕاگرتنی شەڕ و ئاڵوگۆڕی دیلەکان، یان نا.