شوێنەوارێكی دێرین لە گەرمیان دەدۆزرێتەوە و مامۆستایەكی زانكۆ بە بردنی تۆمەتبار دەكرێت

ئاڤا نیوز

 

بەهۆی باران و لافاوی چەند ڕۆژی ڕابردوو لە سنووری گەرمیان، پارچە ئێسکێکی گەورە دەدۆزرێتەوە، شوێنەواری گەرمیان مامۆستایەکی زانکۆی سلێمانی بە بردنی تۆمەتبار دەکات.

لێدوانی فەرمی: ساڵح سەمین، بەڕێوەبەری گشتیی شوێنەواری گەرمیان بە ئاڤا نیوزی گوت: "ئەو مامۆستایە بەبێ ئاگاداری ئێمە بەمەبەستی توێژینەوەی خۆی بەبێ پرسی شوێنەواری گەرمیان و ئیدارە و ئاسایشی ناوچەکە، پارچە ئێسکەکەی بردووە بۆ سلێمانی، دەبێت بيگەڕێنێتەوە و ئەگەر نا ڕێکاری یاسایی دەگرینە بەر".

زانیاريی زیاتر: "بردنی ئەو ئێسکە شێواندن و ڕفاندنی شوێنەوار نەبێ هیچ شتێکی دیکە نییە، پێویستە هەرچی زووە ئەو پارچە شوێنەوارییە بگەڕێنرێتەوە بۆ گەرمیان، دواتر  کنە و پشکنین بۆ ناوچەکەش دەکەین، چونکە ئێسکەکە وا دەرکەوتووە کە مێژووەکەی کۆنە، موڵکی مۆزەخانە و شوێنەواری گەرمیانە". ئەمە گوتەی بەڕێوەبەری گشتیی شوێنەواری گەرمیانە.

ئەوەی پێویستە بیزانیت: ئێسکەکە گەورەیەو تاوەکو ئێستا ئاشکرا نەبووە ئێسكی جۆرە بونەوەرێکە و لەکاتی بارانە بەخوڕەکەدا لەنزیک ناحیەی ڕزگاری گەرمیان، لەناو جۆگەیەکدا دۆزراوەتەوە.

بۆچوونی لایەنی بەرامبەر: تا ئێستا نە ئەو مامۆستایەی بەبردنی پارچە ئێسکەکە تۆمەتبارە، نە لایەنە ئەمنییەکانی گەرمیان ڕوونکردنەوەیان نەداوە.