هەرێمی کوردستان مەرجەکانی بەرهەمهێنان و هەناردەکردنی نەوتی لە ڕێگەی سۆمۆوە جێبەجێکردووە

ئاڤا نیوز

ئەمڕۆ سێشەممە، شاندی حکومەتی هەرێمی کورستان کۆبوونەوەیەکی گرنگ و بەرفراوانیان لەگەڵ چەندین وەزیر و بەرپرسی حکومەتی فیدڕاڵی لە بەغدا ئەنجامدا سەبارەت بە پرسە هاوبەشەکانی هەردوولا بەتایبەتی مووچە و هەناردەکردنەوەی نەوتی هەرێم.

ڕاگەیێنراوی فەرمی: بەگوێرەی ڕاگەیێنراوی وەزارەتی پلاندانانی عێراق، لە میانی کۆبوونەوەکەدا، باس لە کێشە هەڵپەسێردراوەکانی نێوان هەردوولا کرا، لەوانە بەرهەمهێنان و هەناردەکردنەوەی نەوت، داهاتی نانەوتی، هەروەها تەوتینی مووچە، بە پشتبەستن بە بڕیارەکەی دادگای فیدراڵی لەسەر ئەم بابەتە.

 

زانیاریی زیاتر: بەشداربووان جەختیان لەوە کردەوە کە پێشکەوتنی بەرچاو بەدیهاتووە، بەتایبەتی لە بەرهەمهێنان و هەناردەکردنی نەوتی هەرێمدا، چونکە هەموو مەرج و پێداویستییە پێویستەکان بۆ دەستپێکردنی بەرهەمهێنان و هەناردەکردن لەڕێگەی کۆمپانیای نیشتمانی بەبازاڕکردنی نەوت (سۆمۆ) جێبەجێکراون.

 

هەروەها هەردوولا بڕیاریان دا، بەردەوام بن لە گفتوگۆکان بۆ تەواوکردنی ئەو مەرجانەی ماونەتەوە کە پەیوەندییان بە پرسەکانی دیکەوە هەیە.

 

ئەوەی پێویستە بیزانیت: ئەو بەرپرسانەی حکومەتی عێراق لە کۆبوونەوەکەدا بەشداربوون ئەمانە بوون؛ لە وەزیرانی ئاوەدانکردنەوە و نیشتەجێکردن، خوێندنی باڵا، تەندروستی، داد، جگە لە بریکاری سکرتێری وەزارەتی نەوت بۆ کاروباری دەرهێنان، بەڕێوەبەرە گشتییەکانی بەشە یاساییەکان لە وەزارەتی دارایی و ئەمینداریەتی گشتی ئەنجوومەنی وەزیران و دیوانی چاودێری دارایی و ژمارەیەک بەڕێوەبەری گشتی لە وەزارەتەکانی نەوت و دارایی.