هەنجیری ئاکرێ بازاڕی گەرم کردووە و پێشبینی بەرهەمهێنانی هەشت هەزار تۆن دەکرێت

ئاڤا نیوز

 

لەگەڵ هاتنی وەرزی هاوین، هەنجیری ئاکرێ بە ڕەنگ و تامە جیاوازەکەیەوە، بووەتە هێمایەکی ناسراوی ناوچەکە و بازاڕێکی گەرمی بۆ خۆی دروست کردووە، بەجۆرێک خواستێکی زۆری لەسەرە و گەشتیارانیش بەبێ کڕین و تاقیکردنەوەی ناگەڕێنەوە. پێشبینی دەکرێت ئەمساڵ بەرهەمی هەنجیر لە سنوورەکە بگاتە هەشت هەزار تۆن.

چیرۆکی سەرەکی: ناحیەی "بجیل" و گوندەکانی دەوروبەری ئاکرێ، بە ناوەندی سەرەکیی بەرهەمهێنانی هەنجیر دادەنرێن، کە بە چەندین جۆری وەک "یەحیا بەگ" بەناوبانگن. جووتیارانی ناوچەکە هۆکاری تایبەتمەندیی تام و چێژی هەنجیرەکەیان بۆ ئاو و هەوا و خاکی ناوچەکە دەگەڕێننەوە.

لێدوانی فەرمی: سەباح سوورچی، یەکێک لە جووتیارانی ناوچەکە، بە ئاڤای گوت: "ئاوێکی سارد و سازگار و پاکژ دێتە ژێر بنە دارەکانی هەنجیر و هەواکەشی زۆر گونجاوە. زۆر کەس نەمامی هەنجیری ئێمەیان بردووە، بەڵام لای ئەوان هەمان تامی نەبووە، چونکە هەنجیری بجیل زۆر بەتامە و توێکڵەکەی ناسکە."

زانیاریی زیاتر: ئەمساڵ لە سنووری قەزای ئاکرێ، 250 هەزار بنەداری هەنجیر لەسەر ڕووبەری 2500 دۆنم زەوی چێنراون، کە بەرهەم و کوالێتییەکەی جێگەی دڵخۆشیی جووتیارانە.

خواستە زۆرەکەی سەر هەنجیری ئاکرێ وای کردووە بازاڕی فرۆشتنی هەمیشە گەرم بێت. لەزگین عەلی، کە یەکێکە لە فرۆشیارانی هەنجیر، دەڵێت: "ئەم هەنجیرە هی ئاکرێ و دەوروبەریەتی. گەشتیار لە دهۆک، هەولێر و زاخۆوە دێن و دەیکڕن، تەنانەت بۆ بەغدا و بەسڕاش دەنێردرێت. بازاڕی زۆر باشە." لە ئێستادا نرخی یەک کیلۆ هەنجیر لە بازاڕەکاندا لەنێوان سێ بۆ شەش هەزار دیناردایە.

لەلایەکی دیکە: جگە لە بازاڕ، هەنجیر بووەتە بەشێک لە ئەزموونی گەشتیاری لە هاوینەهەوارەکانی ئاکرێ. شەکیرا عەتا، کە گەشتیارێکە و لە سلێمانییەوە سەردانی ناوچەکەی کردووە، وتی: "کەشوهەوایەکی زۆر فێنک و خۆشی هەیە و هەنجیرەکانی ئاکرێ زۆر بەتامن. هیچ هەنجیرێک بۆ تام ناگاتە هی ئێرە."

بۆچی گرنگە: جووتیاران ساڵانە بە فرۆشتنی ئەم بەرهەمە، بەشێکی گرنگی بژێوی ژیانیان دابین دەکەن، ئەمەش وای کردووە گرنگییەکی زیاتر بە فراوانکردنی ڕەزەکانیان بدەن و چوار جۆر هەنجیری جیاواز بەرهەم بهێنن.