بەریتانیا بڕیارێک لەبارەی کۆچبەرانەوە دەدات

ئاڤا نیوز

دادگایەکی باڵای بەریتانیا فەرمانێکی کاتی دەرکردووە کە بەهۆیەوە دەبێت سەرجەم داواکارانی مافی پەنابەری لە هۆتێل بێڵ لە شاری ئێپینگ لە ناوچەی ئێسێکس بچنە دەرەوە.

وێنە گەورەکە: ئەنجوومەنی ناوچەی ئێپینگ سکاڵایەکی یاسایی بۆ ڕێگریکردن لە بەکارهێنانی هۆتێلەکە وەک شوێنی نیشتەجێبوونی پەنابەران تۆمارکرد. دادگای باڵا بڕیاری دا کە دەبێت تا کاتژمێر 4ی پاشنیوەڕۆی 12ی مانگی نۆ، هۆتێلەکە بە تەواوی چۆڵ بکرێت.

هۆکارە زانراوەکان: هۆکاری ئەم بڕیارە دەگەڕێتەوە بۆ ئەو خۆپیشاندان و ناڕەزایەتییە بەرفراوانانەی کە لە ماوەی چەند هەفتەی ڕابردوودا لە نزیک هۆتێلەکە بەڕێوەچوون. خۆپیشاندانەکان دوای ئەوە دەستیانپێکرد کە یەکێک لەو پەنابەرانەی لە هۆتێلەکە نیشتەجێ بوو، بە تۆمەتی دەستدرێژی سێکسی بۆ سەر کچێکی تەمەن 14 ساڵ دەستگیرکرا.

لێدوانی فەرمی: کریس ویتبرێد، سەرۆکی ئەنجومەنی ناوچەی ئێپینگ ڕایگەیاند، خۆپیشاندانە بەردەوامەکان بوونەتە هۆی پەرەسەندنی گرژیی و فشارێکی زۆریان لەسەر کۆمەڵگەکەیان دروستکردووە. 

لەلایەکی دیکەوە: وەزارەتی ناوخۆی بەریتانیا هۆشداری دا، ئەم بڕیارە کاریگەرییەکی بەرچاوی لەسەر توانای حکومەت بۆ نیشتەجێکردنی داواکارانی مافی پەنابەری لە هۆتێلەکانی دیکەی بەریتانیا دەبێت.