دەم پارتی: پێویستە کۆمیسیۆن بیروڕای ئۆجەلان وەربگرێت

ئاڤا نیوز

بریکاری فراکسیۆنی دەم پارتی لە پەرلەمانی تورکیا بە پێویستی دەزانێت، کۆمسیۆنەکەی پەرلەمان کە بۆ پرۆسەی ئاشتی دامەزاروە، دیالۆگ لەگەڵ ئۆجەلان بکات و گوێ لە بیروڕاکانی بگرێت.

چیرۆکی سەرەکی: کۆمیسیۆنی پرۆسەی ئاشتی کە لە فراکسیۆنەکانی ناو پەرلەمانی تورکیا پێکهێنراوە، تا ئێستا چوار کۆبوونەوەی کردووە و ئەمڕۆ کۆبوونەوەی پێنجەم دەکات، ئامانجی ئەوەیە گوێ لە لایەنەکان بگرێت و پرۆسەکە خێراتر بکات.

کڵچ لە کۆنگرەیەکی ڕۆژنامەوانیدا، قسەی لەسەر دوایین پێشهاتەکانی کارەکانی کۆمسیۆنی هاوپشتی نیشتیمانی، برایەتی و دیموکراسی کرد، پێشوازیکردنی کۆمسیۆن لە دایکانی ئاشتی بە قۆناغیکی گرنگ ناوبرد.

ئەم قسانەی کڵچ دوای ئەوە دێت، کۆمسیۆن لە پێنجەم کۆبوونەوەیدا پێشوازی لە دایکانی ئاشتی و دایکانی شەممە کرد، کە ئەو دایکانەن لە شەڕی تورکیا و پەکەکە ڕۆڵەکانیان کوژراون.

لێدوانی فەرمی: گوڵستان کڵچ، بریکاری فراکسیۆنی دەم پارتی لە کۆنگرەیەکی ڕۆژنامەوانی وتی، پێویستە کۆمسیۆنی پەرلەمان قسە لەگەڵ عەبدوڵڵا ئۆجەلان بکات و گوێ لە بۆچوون و پێشنیازەکانی بگرێت، هەروەک چۆن گوێ لە کەسانی زەرەمەندی شەڕ و دایکانی ئاشتی و ڕێکخراوەکانی مافی مرۆڤ دەگیرێت.

زانیاریی زیاتر: بە وتەی کڵچ، ئەم هەنگاوە بۆ خێراتر کارکردنە لەسەر پرۆسەکە لە چوارچێوەیەکی سیاسیدا، هەموو لایەنەکان پێویستە بە بەرپرسیارییەتییەوە هەنگاو بنێن.