مانگی ئایاری ئەمساڵ بایدن و ئەردۆغان لە کۆشکی سپی کۆدەبنەوە

ئاڤا نيوز

بڕیارە ڕۆژی نۆی ئایاری ئەمساڵ ڕەجەب تەییب ئەردۆغان، سەرۆکكۆماری تورکیا، سەردانی ئەمریکا بکات و لە کۆشکی سپی لەگەڵ جۆ بایدن، سەرۆکی ئەمریکا، کۆ ببێتەوە.

وێنە گەورەکە: مانگی کانوونی یەکەمی ئەمساڵ، دوای ئەوەی تورکیا ڕەزامەندی لە سەر بەئەندامبوونی سوێد لە ناتۆ دەربڕی، ئیدارەی بایدن پڕۆژەی فرۆشتنی فڕۆکەی جەنگیی جۆری (F-16)ـی بە بەهای 23 ملیار دۆلار بە تورکیا پەسەند کرد.  

زانیاریی زیاتر: کۆبوونەوەی بایدن و ئەردۆغان دەبێتە یەکەمین کۆبوونەوەی نێوان هەردوو سەرۆک کە لە ناو کۆشکی سپی كرابێت.

ئەوەی پێویستە بیزانیت: سەردانی ئەردۆغان لە کاتێکدایە کە شەڕی غەززە بەردەوامە. سەرۆككۆماری توركیا پێشتر ڕەخنەی تووندی لە ئیسرائیل گرتبوو و بنیامین نەتانیاهۆی سەرۆکوەزیرانی ئیسرائیلی بە ئادۆڵف هیتلەر، سەرکردەی نازییەکانی ئەڵمانیا، شوپهاندبوو؛ ئەو هەروەها ئەمریکای بە سپۆنسەرکردنی جینۆسایدی فەڵەستینییەکان تۆمەتبار کردبوو.