بە سپۆنسەری ئاڤا میدیا سێیەم كۆڕبەندی پەروەردەیی كوردستان بەڕێوەدەچێت

ئاڤا نیوز

لە شاری هەولێر سێیەمین کۆڕبەندی پەروەردەیی کوردستان بەڕێوەدەچێت و ئاڤا میدیا سپۆنسەری میدیایی كۆڕبەندەكەیە، وتەبێژی وەزارەتی پەروەردەش دەڵێت 'ڕاسپاردەی پانێڵستەکان کۆ دەکەینەوە تا سوودی لێ ببینین'.

چیرۆکی سەرەکی: ئەمڕۆ پێنجشەممە، سێیەمین کۆڕبەندی پەروەردەیی کوردستان بە سپۆنسەری ئاڤا میدیا لە هەولێر بەڕێوەدەچێت، تەوەری سەرەکی کۆڕىەندەکە بابەتی ژیری دەستکرد دەبێت.

لێدوانی فەرمی: د.سامان سیوەیلی، وتەبێژی وەزارەتی پەروەردەی حکومەتی هەرێمی کوردستان بە ئاڤا میدیای ڕاگەیاند: پێنج پانێڵ لە کۆڕبەندەکەدا بەڕێوە دەچن و 20 پانێڵست تێیدا بەشدار دەبن، کە لە ئەکادیمیست و پەروەردەکاران و نوێنەرانی ڕێکخراوە پەروەردەییە نێودەوڵەتییەکان بەشداردەبن.

وتەبێژی وەزارەتی پەروەردە ئەمانەشی وت:

٠ بۆ یەکەمین جارە قوتابیان بە پانێڵێک لە کۆڕبەندەکەدا بەشدار دەبن، بۆ ئەوەی دید و بۆچوونیان لەسەر ژیری دەستکرد و پەروەردە بزانرێت.

٠ لە کۆتایی پانێڵەکەدا ڕاسپاردەی پانێڵستەکان کۆدەکرێتەوە و دەکرێن بە ڕاپۆرتێک، دواتر ئەم ڕاپۆرتە دەدرێت بە وەزارەتی پەروەردە.

٠ ئامانج لەم کۆڕبەندە سوود وەرگرتنە لە ژیری دەستکرد، بەگوێرەی هەلومەرجی کوردستان ئەوەی پێویست بێت هەنگاو هەنگاو بەگوێرەی توانا و هەلومەرجی کوردستان سوود لە ژیری دەستکرد دەبینین.

زانیاریی زیاتر: کۆڕبەندەکە بۆ ماوەی دوو ڕۆژ بەردەوام دەبێت.

باکگراوند: یەکەمین کۆڕبەندی پەروەردەیی لە ساڵی 2023 و دووەمین کۆڕبەند لە ساڵی 2024 بەڕێوەچوون.