مەلا بەختیار: خانەقین لەبەردەم تێكشانی سەنگەری یەكەمی بەرگریی كوردستانیبوونیەتی

ئاڤا نیوز

مەلا بەختیار، لەبارەی تەعریبی نوێی خانەقین هۆشداری دەدات و دەڵێت، "ئەگەر نەتوانین بەرگریی لە دەسكەوتەكانی خوێندنی باڵا و پەروەردەی خانەقین بكەین، سەنگەری یەكەمی بەرگری لە كوردستانییەتی ئەو ناوچەیە دەشكێت و شكستی دیكەشی بەدوادا دێت".

چیرۆكی سەرەكی: سێ كۆلێژی خانەقین، تا ئێستا لەڕووی یاساییەوە گرفتیان هەیە و هەڕەشەی مەرجە سەپێنراوەكانی بەعقوبە و بەغدا بۆ قەدەغەكردنی خوێندن بە زمانی كوردییان لەسەرە، قوتابیانی ئەو كۆلێژانەش دژی ئەم مەرجانە، مانیان گرتووە.

لێدوانی فەرمی: مەلا بەختیار، بەرپرسی پێشووی باڵای یەکێتیی نیشتمانیی کوردستان لە ئەژماری فەرمیی خۆی لە تۆڕە كۆمەڵایەتییەكان، نامەیەكی كراوەی ئاراستەی سەركردە باڵاكانی عێراق و هەرێمی كوردستان كردووە و ئاماژەی بەوە كردووە، "ئەو كێشەیە تەنها بە وەزارەتی خوێندنی باڵا چارەسەر نابێت، بەڵكو پێویستە هەردوو حكومەتی هەرێمی كوردستان و حكومەتی فیدراڵ و فراكیسیۆنە كوردستانییەكانی نێو پەرلەمانی عێراق بێنە سەر هێڵ، هیچ نەبێت تا پرسی ماددەی 140 ساغ دەبێتەوە، دژایەتیی كۆلێژە كوردییەكانی خانەقین نەكرێت، با سەرووی هەزار و 500 خوێندكار و 150 مامۆستا و كارمەند ناكام نەبن."

هاوكات، نیگەرانی دەردەبڕێت لەوەی عێراق ڕێگه‌ بە دامەزراندنی زانكۆی بێگانه‌ دەدات، به‌ڵام ڕێگری لە كۆلێژه‌ كوردییەكان دەگرێت لە ناوچە كوردستانییەكان دابمەزرێن.

باكگراوند: خانەقین لە دیارترین ئەو ناوچانەی كوردستانە كە زۆرترین باجی كوردستانیبوونی داوە و لە شۆڕشی ئەیلوولەوە تا ئێستا؛ نزیكەی 700 شەهیدی داوە، هەزار و 672 گوندی ناوچەكە تەختكراون و خەڵكەكەشی بۆ خوارووی عێراق راگوێزراون. هاوکات، 643 گوندی تەعریب كراون و زیاتر لە 800 كەس لە ناوچە جیاجیاكان دەركراون و 67 گوند و گەڕەكی كوردی بە ناوی عەرەبییەوە گۆڕدراون لەگەڵ چەندین پێشێلكاری دیكە.