ئاراس شێخ جەنگی: نابێت بهێڵرێت لە سلێمانی خوێن بڕژێت

ئاڤا نیوز

ئاراس شێخ جەنگی بە ئاڤا میدیای وت، ئەو دۆخەی ئێستا لە سلێمانی درووستبووە لە بەرژەوەندی هیچ کەسێک نییە. هەر کارێکی توندوتیژی دەرئەنجامی خراپی دەبێت و خوێنی خەڵکی تیا دەڕژێت، بۆیە دەبێ ڕێگری لێ بکرێت.

لێدوانی فەرمی: ئاراس شێخ جەنگی، برای لاهوور شێخ جەنگی، سەرۆکی بەرەی گەل بە ئاڤا میدیای وت، ئەو دۆخەی دروستبووە و هێز بڵاوەی پێکراوە لە بەرژەوەندی هیچ لایەک نییە، ئەم دۆخەی هی ئەوەنییە بەرەو خراپی ببرێت. هەر جموجۆڵێکی سەربازی دەبێتە هۆکاری ڕشتنی خوێنی خەڵک و سلێمانی پرسەدار دەبێت، ئەمەش کەس تەمەننای پێ ناخوازێت.

چی ڕوویدا: لە کاتژمێر 3ـی دوای نیوەڕۆی ئەمڕۆ پێنجشەممەوە هێزێکی زۆری ئەمنی لە سلێمانی جموجۆڵیان پێ کرا و قەرەباڵغی زۆر لە بازگەکان دروستبوو. هێزێکی زۆریش لە دەووروبەری ماڵی لاهوور شێخ جەنگی بڵاوەی پێکراو و هەموو ڕێگاکانی چوون بۆ لالەزار (شوێنی مانەوەی لاهوور شێخ جەنگی) داخران. تا ئێستاش بارگرژی بەردوامی هەیە.