هەواڵگریی عێراق هۆشداری بە هاووڵاتیان دەدات؛ ئاگاداری ماستەرکاردەکانتان بن

ئاڤا نیوز

ئاژانسی هەواڵگریی وەزارەتی ناوخۆی عێراق، هۆشدارییەکی توند دەداتە هاووڵاتییان و دەڵێت " ئاگاداری ئەو فێڵە نوێیانە بن کە لە ڕێگەی ماستەرکاردەوە پارەتان دەدزن."

لێدوانی فەرمی: عەمید ئەحمەد محەممەد عوبێد، بەڕێوەبەری ڕاگەیاندنی ئاژانسی هەواڵگری و لێکۆڵینەوەی فیدراڵی لە وەزارەتی ناوخۆی عێراق ڕایگەیاند: ئەوەی ڕوودەدات چەند بارێکی تاکەکەسین کە لەلایەن کەسانی قۆڵبڕ و فێڵبازەوە دەکرێن بۆ دزین و دەست بەسەرداگرتنی پارەی خەڵکییە لەڕێگەی ماستەرکاردەکانیانەوە.

عەمید ئەحمەد محەممەد عوبێد داوای لەهاووڵاتییان کرد، بۆ ڕێگریکردن لەم دیاردەیە ئاگاداری ئەم خاڵانە بن:

- زانیارییە هەستیارەکانی کارتەکە، وەک ژمارەی کارتەکە، بەرواری بەسەرچوون، ئەو سێ ژمارەیەی لە پشتییەوەیە (CVV)، بە هیچ کەس و لایەنێکی نەناسراو نەدەن.

- هیچ لینکێک کە بە نامە (SMS) یان لە سۆشیاڵ میدیاوە هات و گومانتان لێی بوو، نەیکەنەوە.

- نابێت ماستەرکارد بۆ کاری نایاسایی وەک کڕینی دراوی دیجیتاڵی یان فۆرێکس بەکار بهێنن، چونکە کێشەی یاسایی لێدەکەوێتەوە.

لەلایەکی دیکەوە: داوا لەو کەسانە دەکات کە پارەیان لەڕێگەی ماستەرکاردەوە لێ دەدزرێت، ڕاستەوخۆ پەیوەندی بە ژمارە تەلەفۆنی فریاکەوتنی وەزارەتی ناوخۆ 911 بکەن یان سەردانی بنکەکانی هەواڵگری بکەن.