سوودانی تیمێکی تایبەت ڕەوانەی سلێمانی دەکات

ئاڤا نیوز

بەرپرسێکی حکومی ئاشکرای کرد، محەممەد شیاع سوودانی، سەرۆکوەزیرانی عێراق، تیمێکی لە ڕاوێژکارانی ڕەوانەی سلێمانی کردووە، ئەمەش وەک هەوڵێک بۆ هێورکردنەوەی بارودۆخەکە دوای دەستگیرکردنی لاهور شێخ جەنگی، سەرۆکی بەرەی گەل.

چیرۆکی سەرەکی: ئێوارەی ڕۆژی پێنجشەممە 21-8-2025 هێزە ئەمنییەكانی سلێمانی چواردەوری شوێنی نیشتەجێبوونی لاهوور شێخ جەنگی، سەرۆكی بەرەی گەلیان لەلالەزار گرت و دوای گرژی ڕووبەڕووبوونەوە بەرەبەیانی هەینی لاهوور شێخ جەنگی و پۆڵادی برای و ڕێبوار حامی حاجی غالی دەستگیر كران.

زانیاریی بەدەستهاتوو: ئاڤا زانیویەتی، ڕاوێژکارەکانی سوودانی هەریەکەن لە حامید موسەوی، عەبدولئەمیر تعێبان و حوسێن عەلاوی، بەیانیی ئەمڕۆ بەغدایان بەرەو سلێمانی بەجێهێشتووە.

زانیاریی زیاتر: تیمەکەی سوودانی دەستپێشخەرییەکی سیاسییان بۆ دەستپێکردنی گفتوگۆ لەنێوان بافڵ تاڵەبانی و لاهور شێخ جەنگی هێناوە، بە مەبەستی گەیشتن بە ڕێککەوتنێک کە جێی ڕەزامەندیی هەردوولا بێت و دۆخەکە لە گرژییەکانی ئێستا هێوربکاتەوە.

هاوکات زانیارییەکان ئاماژە بەوەش دەکەن کە حکومەتی عێراق نایەوێت بارودۆخی سلێمانی خراپ بێت، بەتایبەت لەبەر ڕۆشنایی ئەو بارودۆخەی کە لەناوچەکە هەیە.