کۆمپانیای هەنت ئۆیڵی ئەمریکی کارەکانی لە هەرێمی کوردستان دەستپێدەکاتەوە

ئاڤا نیوز

دوای ڕاگرتنی کارەکانی بۆ ماوەی نزیک لە مانگێک کۆمپانیای "هەنت ئۆیل"ی ئەمریکی دەستپێکردنەوەی کارەکانی لە هەرێمی کوردستان ڕاگەیاند.

وێنە گەورەکە:  ڕۆژی چوارشەممە 16ی تەممووزی 2025، لە کاتژمێر 7:14، لەڕێگەی درۆنێکی بۆمبڕێژکراوەوە هێرش کرایە سەر کێڵگەی نەوتی هەنت ئۆیڵی ئەمریکی لە باعەدرێ لە قەزای شێخانی سەر بە پارێزگای دهۆک، وەک ڕێکارێکی خۆپارێزیش کۆمپانیایەکە کارەکانی ڕاگرت، ئێستا و دوای نزیک لە مانگێک ئەو کۆمپانیایە دەستپێکردنەوەی کارەکانی لە ناوچەکە ڕادەگەیەنێت. 

لیدوانی فەرمی: وتەبێژێکی کۆمپانیاکە بە ئاژانسی هەواڵی "ڕۆیتەرز"ی ڕاگەیاندووە: بەرهەمهێنانی نەوت لە کێڵگەی نەوتی هەنت ئۆیڵی ئەمریکی لە باعەدرێ لە قەزای شێخانی سەر بە پارێزگای دهۆک دەسپێدەکاتەوە و تا کۆتایی ئەم مانگە دەگەڕێتەوە دۆخی ئاسایی خۆی.

زانیاریی زیاتر: ئەم بڕیارە دوای هەنگاوی هاوشێوەی کۆمپانیا نەوتییەکانی دیکە دێت، لەوانەش کۆمپانیای "دی ئێن ئۆ"ی نەرویجی کە دوای ئەوەی لە مانگی تەموزی ڕابردوودا ڕووبەڕووی هێرشی هاوشێوە بووەوە، دەستی بە کارەکانی لە کێڵگەکانی کوردستان کردەوە.

ئەوەی پێویستە بیزانیت: بەهۆی هێرشە درۆنییەکانی هەفتەکانی ڕابردوو بۆسەر ژێرخانی وزەی کوردستان، کارکردن لە پێنج کێڵگەی نەوتی وەستا، ئەوانەی دیکەش بەهۆکاری ئەمنی کارکردنیان سنووردار کرد.

ژمارەکان وادەڵێن: لە هەرێمی کوردستان، 52 بلۆکی نەوتی هەیە، بەڵام تەنیا لە 9 بلۆک کار دەکرێت، هەشت بلۆکیان لە سنووری پارێزگای هەولێر و دهۆکن و یەکێکیان لە سنووری پارێزگای سلێمانییە.