هاکان فیدان: بۆ شەڕی پەکەکە مۆڵەت لە کەس وەرناگرین

ئاڤا نیوز

وەزیری دەرەوەی تورکیا ڕایگەیاند، بە هاوکاری لەگەڵ وڵاتانی دراوسێ هەنگاوی جددی بۆ لەناوبردنی تیرۆر دەنێن، هەنگاوی یەکەمیشیان لەگەڵ عێراقە. جەختیشی کردووەتەوە بۆ شەڕی پەکەکە مۆڵەت لە کەس وەرناگرن.

لێدوانی فەرمی: هاکان فیدان، وەزیری دەرەوەی تورکیا دەڵێت: لایەنگرانی پەکەکە لە بەلژیکا هێرشیان کردووەتە سەر هاووڵاتیانی تورکیا، داوامان لە بەرپرسانی ئەو وڵاتە کرد زوو دەستوەردان بکەن، داواکاری و هەستیاریمان لەسەر ئەو بابەتە بە وەزیری دەرەوەی بەلژیکا ڕاگەیاند. پەکەکە لەو وڵاتانەی ماوەی چەندین ساڵە داڵدەدی داون پشێوی دروست دەکات، ئەوەش پێویستی بە تێفکرینی ئەو وڵاتانەیە و دەبێت وانەی لێوەربگرن.

 

لەلایەکی دیکەوە: تورکیا داوای لە دەسەڵاتدارانی ئەڵمانیاش کردووە ڕێوشوێنی پێویست بگرێتە بەر بەرامبەر ئەوانەی هێرشیان کردە سەر کۆنسوڵخانەی تورکیا لە شاری هانۆڤەر.

 

ژمارەکان وا دەڵێن: زەکی ئوزتورک ڕاوێژکاری پەیوەندییە گشتیەکان و ڕاگەیاندنی وەزارەتی بەرگری تورکیا ڕایگەیاند، لە ماوەی ئەم هەفتەیەی دواییدا 38 ئەندامی پەکەکەیان لە باکووری سووریا و عێراق کوشتووە، لە سەرەتای ئەمساڵیشەوە 646 ئەندامی پەکەکە کوژراون، 268 کەس لە عێراق، 378 کەسیش لە باکووری سووریا.