بە فەرمانی شاخه‌وان عه‌بدوڵڵا به‌دواداچوون بۆ داوكارییه‌كانی‌ خانه‌واده‌ی‌ شه‌هیدان دەکرێت

ئاڤا نیوز

شاخەوان عەبدوڵڵا، جێگری سەرۆکی پەرلەمانی کوردستان فەرمانی کرد لە نووسینگەکەیەوە‌ به‌دواداچوون بۆ داوكارییه‌كانی‌ خانه‌واده‌ی‌ شه‌هیدانی وه‌زاره‌تی‌ شه‌هیدان و ئه‌نفالكراوانی‌ هه‌رێمی‌ كوردستان بکرێت ئەوەش به‌گوێرەی‌ یاسای‌ ده‌زگای‌ شه‌هیدانی‌ عێراق.

ڕاگەیێنراوی فەرمی: بەگوێرەی ڕاگەیێنراوی نووسینگه‌ی‌ ڕاگه‌یاندنەکەی،‌ شاخەوان عەبدوڵڵا جه‌ختیكردووەتەوە لەسەر‌ كاراكردنی‌ دوایین هه‌مواری‌ یاسای‌ ده‌زگای‌ شه‌هیدان و گرتنەبەری ڕێکارەکانی بە جۆرێك مافی‌ و ئیمتیازاتی‌ كه‌سوكاری‌ شه‌هیدان بۆ‌ فه‌رمانبه‌رانی‌ ده‌ره‌وه‌ی‌ هه‌رێم دەستەبەر بکات.

لە ڕاگەیێنراوەکەدا هاتووە؛ ئه‌م راسپارده‌یه‌ له‌چوارچێوه‌ی‌ په‌رۆشییانه‌وە دێت بۆ دەستەبەر کردنی وه‌رگرتنی‌ هه‌موو ئه‌و ماف و ئیمتیازانه‌ی‌ به‌پێی‌ یاسا بۆ كه‌سوكاری‌ شه‌هیدان دیاریكراوه‌ و پته‌وكردنی‌ هه‌ماهه‌نگی‌ هاوبه‌شی‌ نێوان دامه‌زرا‌وه‌ فیدراڵیه‌كان و هەرێمی کوردستان بۆ بەدیهێنانی دادپه‌روه‌ری‌ و پاراستنی مافی ئه‌و توێژه‌.

زانیاریی زیاتر: به‌شی‌ كاروباری‌ هاووڵاتییانی‌ سه‌ر به‌ نووسینگه‌ی‌ ناوبراو، ده‌ستیكردووه‌ به‌ وه‌رگرتنی‌ داواكارییه‌كانی‌ ئەو هاووڵاتییانەی‌ یاساكه‌ ده‌یانگرێته‌وه‌.