ژیریی دەستکرد و سۆلار سیستم بۆ خوێندنی پیشەیی زیاد دەکرێن

ئاڤا نیوز

بڕیارە هەردوو بەشی ژیریی دەستکرد و سۆلار سیستم (کارەبا لەڕێگەی وزەی خۆر) لە خوێندنی ئامادەیی پیشەیی زیاد بکرێن.

وێنە گەورەکە: وەزارەتی پەروەردەی هەرێمی کوردستان بەردەوام لەگەڵ پێشکەوتنەکان و خواستی بازاڕی کار گۆڕانکاری لە پرۆگرامەکانی خوێندن دەکات، بۆ ئەم قۆناغە و هاوتەریب لەگەڵ پێشکەوتنی خێرای جیهان لە بواری سۆلار سیستم و ژیریی دەستکرد، کار لەسەر ئەوە دەکرێت دوو بەشی جیای ئەو دوو بوارە لە خوێندنی پیشەیی بکرێنەوە.

لێدوانی فەرمی: حەسەن سەرتیپ جاف، بەڕێوەبەری گشتیی پڕۆگرامەكانی خوێندن لە وەزارەتی پەروەردەی هەرێمی کوردستان بە ئاڤا میدیای گوت، ئێستا کار لەسەر دانانی پرۆگرامی خوێندن بۆ هەردوو بەشی ژیریی دەستکرد و سۆلار سیستم دەکەین، بۆ ساڵی داهاتوو واتا ساڵی 2026-2027، ئەم دوو بەشە بۆ خوێندنی پیشەیی دەکرێنەوە.

 

زانیاریی زیاتر: ئامادەیی پیشەیی چەند بەشێکی پیشەیی وەک بازرگانی و پیشەسازی لە خۆدەگرێت. قوتابییانی دەرچووی پۆلی نۆی بنەڕەتی لەو ئامادەییە وەردەگیرێن، دەرچووانیشی بڕوانامەی ئامادەیی پیشەییان پێدەدرێت.

بۆچی گرنگە: ژیریی دەستکرد و سۆلار سیستم لە هەرێمی کوردستان پێشکەوتنی خێرا و بەرچاوی بەخۆیەوە بینیوە، بۆیە ئامادەکردنی دەستی کاری پیشەیی لەو دوو بوارە جگە لەوەی خواستی بازاڕ بۆ دەستی کاری شارەزا پڕدەکاتەوە، هەلی کاری زیاتریش بۆ گەنجان دەڕەخسێنێت.

باکگراوند:  ڕۆژانی پێنجشەممە و هەینی ڕابردوو،21 و 22ی ئەم مانگە، بە بەشداری ژمارەیەک لە بەرپرسانی پەروەردەیی و پسپۆڕان و شارەزایانی پەروەردەیی و ژیریی دەستکرد، سێیەمین کۆڕبەندی پەروەردەیی کوردستان بە سپۆنسەری ئاڤا میدیا لە هەولێر بەڕێوەچوو، کۆڕبەندەکە لەلایەن وەزارەتی پەروەردەی هەرێمی کوردستان ئەنجام درا و تەوەری سەرەکی کۆڕبەندەکە بابەتی ژیریی دەستکرد بوو.