ئەندامێکی سەرکردایەتیی یەکێتی: سلێمانی زۆر ئارامە و ئاسایش بەرقەرارە

ئاڤا نیوز

هێشتا ئاسەواری شەڕ و ڕووبەڕووبوونەوەکانی ‌نێوان بافڵ تاڵەبانی و لاهوور شێخ جەنگی لە سلێمانی ماون، ئەندامێکی سەرکردایەتیی یەکێتیش دەڵێت: سلێمانی زۆر ئارامە و ئاسایش بەرقەرارە.

وێنە گەورەکە: بەرەبەیانی هەینی ڕابردوو، زیاتر لە 10 هەزار کەس لە دژەتیرۆر، کۆماندۆ و ئاسایشی یەکێتی بە تانک، تۆپ، درۆن و دۆشکە و بیکەیسی و چەندین چەکی جیاوازەوە هێرشیانکردە سەر هۆتێل لالەزار و شوێنی مانەوەی لاهوور شێخ جەنگی لە گەڕەکی سەرچناری شاری سلێمانی، ڕووداوەکە ترس و نیگەرانیی زۆری لەلای هاونیشتمانیان دروستکرد و داوای ڕاگرتنی گرژییەکانیان دەکرد، سەدان گەشتیاریی بیانیش سلێمانیان بەجێهێشت.

لێدوانی فەرمی: لەتیف نێروەیى، ئەندامى سەرکردایەتیی یەکێتیى نیشتمانیی کوردستان، بە میدیای فەرمیی یەکێتیی ڕاگەیاندووە: لەم هەفتەیەدا چەندین چالاکى رۆشنبیرى و نێودەوڵەتى لە سلێمانى بەڕێوەدەچێت، ئەمەش ماناى ئەوەیە سلێمانى زۆر ئارامە و ئاسایش بەرقەرارە، بۆیە ئەم چالاکییانە لە سلێمانى بەڕێوەدەچن.

وتیشى: سبەی دووشەممە 25-8-2025، کۆنفرانسێکی نێودەڵەتی لە شاری سلێمانی لەژێر ناوی جینۆسایدی کورد و رەنگدانەوەی لە (ئەدەب، هونەر، میدیا)دا بەڕێوەدەچێت، میوانەکانی کۆنفرانسەکە لە حەوت وڵاتی جیهانەوە بەشدارن و دوو رۆژ دەخایەنێت. مەڕاسیم و دیبەیتێکی تایبەت بە وڵاتی چین بەبەشداری چەندین دیپلوماتکار، کەسایەتیی سیاسی و ڕۆشنبیر و میدیاکار لە سلێمانی دەکرێت.