وتەبێژی پارتی بۆ ئاڤا: پرۆسەی پێکهێنانی کابینەی نوێی حکومەت خێراتر دەکرێت

ئاڤا نیوز

وتەبێژی پارتی دیموکراتی کوردستان ئاماژە بەوەدەدات، مانگی نۆ دەستەی سەرۆکایەتیی پەرلەمان هەڵدەبژێردرێت و دوای ئەوەش پۆستەکانی دیکە یەکلایی دەکرێنەوە.

وێنە گەورەکە: پارتی و یەكێتی براوەی یەكەم و دووەمی هەڵبژاردنی خولی شەشەمی پەرلەمانی كوردستان بوون، لە گفتوگۆکانیان بۆ پێكهێنانی كابینەی دەیەمی حكومەتی هەرێمی كوردستان بەردەوامن و هەردوولا لە ڕێككەوتنی كۆتایی نزیکبوونەتەوە.

لێدوانی فەرمی: مەحموود محەممەد، وتەبێژی پارتی بە ئاڤای گوت، "وەرقەیەک لە نێوان هەردوولامان ئامادەکراوە کە لێکتێگەیشتنی لەسەر شێوازی پێکهێنانی حکومەت تێدایە، لە ئایندەیەکی نزیک جارێکی دیکە پارتی و یەکێتی کۆدەبنەوە و مانگی داهاتوو هەنگاوەکان بۆ پێکهێنانی کابینەی دەیەمی حکومەت خێراتر دەکرێت."

زانیاریی زیاتر: بەگوێرەی زانیارییەکانی وتەبێژی پارتی، ئەگەر هەردوولا واتا پارتی و یەکێتی لەسەر ڕێککەوتنی نێوانیان کۆک بن، پێکهێنانی کابینەی نوێی حکومەت خێراتر دەکرێت و دوای هەڵبژاردنی دەستەی سەرۆکایەتی پەرلەمان پۆستەکانی دیکەش یەکلایی دەکرێنەوە.