دژەتیرۆری عێراق مەترسیدارترین "تیرۆریست"ـی لە بەغدا دەستگیرکرد

ئاڤا نیوز

دەزگای دژەتیرۆری عێراق دەستگیرکردنی یەکێک لە مەترسیدارترین تیرۆریستەکانی لە بەغدا ڕاگەیاند، کە چەندین پۆستی لەناو ڕێکخراوی تیرۆریستیی داعشدا هەبووە.

وێنە گەورەکە: ئەگەرچی چەکدارانی داعش لە عێراق شکستیان هێناوە و هیچ شوێنێکیان لەدەست نەماوە، بەڵام گەڕان بەدوای شانە نووستووەکان و چەکدارانی ئەو ڕێکخراوە بەردەوامە.

ڕاگەیێنراوی فەرمی: بەگوێرەی ڕاگەیێنراوێکی دەزگای دژەتیرۆری عێراق، کە وێنەیەکی دەست ئاڤا میدیا کەوتوو، "پاڵەوانانی دەزگاکە توانیان یەکێک لە مەترسیدارترین تیرۆریستەکان لە بەغدا دەستگیر بکەن، کە فەرمانی دەستگیرکردنی لەلایەن دادوەری دەزگاکەمانەوە بۆ دەرچووبوو."

ئەوەی لەبارەیەوە دەگوترێت: "ئەم تیرۆریستە لە چوارچێوەی ئەوەی پێی دەوترێت ویلایەتی باشوور بە پۆستی (عەسکەری) کاری کردووە، پاشان گواستراوەتەوە بۆ کارکردن لەناو ویلایەتی نەینەوا لە بەشی ناسراو بە (پۆلیسی ئیسلامی)، دواتر بۆ کارکردن لە (دەستەی شەرعی - کەتیبەی بانگەواز) دانراوە و لەدوای ئەوەش گواستراوەتەوە بۆ کارکردن لەناو ئیدارەی (فرقەی نەهاوەند) لەناو گرووپە تیرۆریستییەکانی داعشدا".