کۆمپانیای کۆرەک تیلیکۆم لە چارەسەرکردنی تەواوی کێشەکانی نزیکبووەتەوە

ئاڤا نیوز

هەفتەیەکی پڕ گفتوگۆ و لێکتێگەیشتن لەبەردەم کۆمپانیای کۆڕەک تیلیکۆمدایە و پێشبینی دەکرێت سزاکانی سەر ئەو کۆمپانیا کوردییە هەڵبگیرێت. 

وێنە گەورەکە: بە بیانووی کەڵەکەبوون و نەدانەوەی قەرزەکانی، لە کۆتاییەکانی ساڵی 2023، دەستەی ڕاگەیاندن و پەیوەندییەکانی عێراق چەند سزایەکی بەسەر کۆمپانیای کۆڕەک تیلیکۆمدا سەپاند، دیارترینیان ڕاگرتنی پەیوەندیی تەلەفۆنی نێوان کۆمپانیاکە و هێڵەکانی دیکە بوو، هەروەها لە 18-2-2025، دەستەکە داوای لە وەزارەتی پەیوەندییەکانی عێراق کرد دەستبەجێ خزمەتگوزاریی ئینتەرنێت لەسەر کۆمپانیاکە ببڕدرێت.

زانیاریی بەدەستهاتوو: ئاڤا میدیا زانیویەتی گفتوگۆکانی نێوان کۆمپانیای کۆڕەک تیلیکۆم و لایەنە پەیوەندیدارەکانی عێراق لەسەر هەڵگرتنی سزاکانی سەر کۆرەک بەردەوامە، پێشبینی دەکرێت تاوەکو هەفتەی داهاتوو پێشنیازەکان یەکلایی بکرێنەوە و ڕێککەوتن بۆ چارەسەرکردنیان بکرێت.

زانیاریی زیاتر: ئەگەر حکومەتی عێراق کێشەی دیکە نەخاتە بەردەم کۆمپانیای کۆڕەک، ئەوا لە ڕۆژانی داهاتوودا سزاکانی سەر کۆمپانیاکە هەڵدەگیرێن، هەروەها کۆرەک نیازپاکی خۆی بۆ چارەسەرکردنی کێشەکان دەربڕێوە و دەیەوێت کارکردنی تۆڕەکەی ئاسایی ببێتەوە و هاووڵاتیان سوود لە خزمەتگوزارییەکانیان وەربگرن. 

كاریگەری و لێكەوتەكان: کۆڕەک تیلیکۆم نزیکەی 10 ملیۆن هاوبەشی هەیە، بەهۆی ڕاگرتنی خزمەتگوزارییەكانی سەدان هەزار هاووڵاتیی عێراقی لە هێڵی ئینتەرنێت بێبەش بوون، پەیوەندیی تەلەفۆنی نێوان کۆرەک تیلیکۆم و هێڵەکانی دیکەش وەستاوە، ئەمە گرفتی بۆ ملیۆنان هاوبەشی کۆرەک تیلیکۆم و هێڵەکانی دیکە دروست کردووە و ناتوانن پەیوەندیی بە یەکترەوە بکەن.