ئەمینداری حیزبوڵڵا: لە ڕووبەڕووبوونەوەی ئیسرائیل بەردەوام دەبین

ئاڤا نیوز

نەعیم قاسم، ئەمینداری گشتیی حیزبوڵڵای لوبنان دووپاتی دەکاتەوە ڕووبەڕووی "دەستدرێژییەکان"ی ئیسرائیل دەبنەوە و ئاماژەی بەوە کرد، حکومەتی لوبنان لە بڕیاری چەککردنی حیزبوڵڵا گوناهی کردووە و پێویستە پاشگەز ببێتەوە.

ڕاگەیێنراوی فەرمی: نەعیم قاسم، ئەمینداری گشتیی حیزبوڵڵای لوبنان ڕایگەیاند: 

- مقاوەمە لە لوبنان توانی لە ساڵی 2006  تا 2023 ئیسرائیل ڕابگرێت و ئەمەش دەستکەوتێکی ناوازەیە، بە سوپا و گەل و مقاوەمە توانیمان بۆ ماوەی 17 ساڵ ئیسرائیل ڕابگرین.

- ڕەنگە ئیسرائیل داگیرکاری و وێرانکاریی بکات، بەڵام ئێمە ڕووبەڕووی دەبینەوە بۆ ئەوەی بە ئامانجەکانی نەگات و ئەمەش لە چوارچێوەی دەسەڵاتی ئێمەدایە، ئەگەر مقاوەمە نەبوایە ئیسرائیل دەگەیشتە بەیرووت هەروەک چۆن گەیشتە دیمەشق.

گۆشەیەکی دیکەی دیمەنەکە: قاسم دەربارەی چەککردنی حیزبوڵڵا گوتی: حکومەتی لوبنان بڕیارێکی هەڵەی داوە بە داماڵینی چەک لەدەستی مقاوەمە لەکاتێکدا دەستدرێژی ئیسرائیل بەردەوامە، بڕیارەکەی حکومەت نادەستوورییە و بەپێی دیکتاتۆری ئەمریکا و ئیسرائیل گیراوە، هەنگاوی ئەمریکی ئامانجی تێکدانی لوبنانە و بانگەوازێکە بۆ فیتنە.

ئەوەی پێویستە بیزانیت: ڕۆژی سێشەممەی ڕابردوو، حکومەتی لوبنان ئەرکی داڕشتنی پلان "کۆکردنەوەی چەک بۆ هێزە شەرعییەکان" بە سوپا ڕاسپارد تاوەکو پێش کۆتایی ساڵ تەواو بێت.