پەرلەمانی عێراق دەنگ لەسەر هەمواری یاسای دامەزراوەی شەهیدان دەدات

ئاڤا نیوز

پەرلەمانی عێراق بۆ دووەم ڕۆژ کۆدەبێتەوە و خوێندنەوەی یەکەم و دووەم چەند پرۆژە و پێشنیازە یاسایەک دەکات، گرنگترینیان هەموارکردنی یاسای دامەرزراوەی شەهیدانە. 

وێنە گەورەکە: ڕۆژی دووشەممە، پەرلەمانی عێراق دانیشتنێكی ئەنجامدا و هەمواری یەکەمی یاسای وەزارەتی پەروەردەی پەسەند کرد و بەو پێیەش دەرماڵەی مامۆستایان بۆ مانگانە 300 هەزار دینار زیادکرا، بڕیارە ئەمڕۆ کاتژمێر 01:00ی پاش نیوەڕۆ جارێکی دیکە سەبارەت بە چەند بابەتێک دانیشتنێکی دیکە ئەنجام بدات.

ڕاگەیێنراوی فەرمی: پێشتر پەرلەمانی عێراق کارنامەی ڕۆژەکانی 25، 26 و 27ی ئەم مانگەی بڵاوکردبووەوە، کارنامەی دانیشتنی ڕۆژی سێشەممە 26ـی ئاب:

- دەنگ لەسەر پێشنیازەیاسای هەموارکردنی دووەمی یاسای دامەزراوەی شەهیدان ئەنجام بدرێت.

- دەنگ لەسەر پێشنیازەیاسای ڕێکخستنی وزەی نوێبووەوە بدرێت.

- خوێندنەوەی یەکەم بۆ پرۆژەیاسای قەرەبووکردنەوەی زیانلێکەوتووانی ئۆپەراسیۆنە و هەڵە سەربازییەکان دەکرێت.

- خوێندنەوەی یەکەم بۆ پرۆژەیاسای هەمواری یەکەمی یاسای چاودێریکردنی کەسانی خوار تەمەنی یاسایی.

-  خوێندنەوەی دووەم بۆ پرۆژەیاسای کاغەزی دارایی و کاڵاکان.

- خوێندنەوەی دووەم بۆ پێشنیازەیاسای هەموارکردنی یاسای دەستەی گشتیی چاودێریکردنی هاوردەکان.

زانیاریی زیاتر: ڕۆژی سێشەممە 27ی ئەم مانگە، پەرلەمان دەربارەی حەوت برگەی دیکە کۆدەبێتەوە دیارترینیان، دەنگدان لەسەر پێشنیازەیاسای هەمواری سێیەمی یاسای قەرەبووکردنەوەی ئەو کەسانەی بەهۆی کردەوەکانی رژێمی پێشوو(بەعس)ەوە زیانی جەستەیییان بەرکەوتووە.