بەهۆی پابەند نەبوون بە ڕێنماییەکان قوتابخانەیەکی تایبەت لە هەولێر دادەخرێت

ئاڤا نیوز

بەهۆی پابەند نەبوون بە ڕێنماییەکان، سەرۆکایەتیی شارەوانیی هەولێر بڕیاریدا قوتابخانەی زانیاری ناحکومی لە هەولێر دابخات، ئەمەش نیگەرانی قوتابیانی لێکەوتەوە، بەهۆی ئەوەی هۆڵی قوتابخانەکە تاقیکردنەوەی خولی دووەمی پۆلی 12ی ئامادەیی لێدەکرێت.

لێدوانی فەرمی: دلێر عەبدوڵڵا، بەڕێوەبەری پەروەردەی ناوەندی هەولێر بە ئاڤای ڕاگەیاند، لەو قوتابخانەیە سێ هۆڵی تاقیکردنەوە هەیە، نزیکەی 200 قوتابی پۆلی 12 تاقیکردنەوەی خولی دووەم دەکەن، "بۆیە داوامان لە سەرۆکایەتیی شارەوانیی هەولێر کردووە ڕێکارەکانیان بۆ دوای تەواو بوونی تاقیکردنەوەکان دوابخەن، چونکە لە ڕووی دەروونی قوتابییان و کارگێڕیەوە، ناکرێت هۆڵەکان بگوازینەوە قوتابخانەیەکی دیکە".

لەلایەکی دیکەوە: کارزان عەبدولهادی، سەرۆکی شارەوانیی هەولێر بە ئاڤا میدیای وت، "بەهۆی تاقیکردنەوەی پۆلی 12ـەوە، جێبەجێکردنی ڕێکارەکانمان دواخست بۆ دوای تاقیکردنەوەی پۆلی 12، داواشمان لە قوتابخانەکە کردووە تا ئەو کاتە ڕێنماییەکان جێبەجێ بکات، ئەگەر پابەند نەبێت، ڕێکاری یاسایی و کارگێڕی لەبەرامبەر دەگیرێتەبەر".