بەڕێوەبەری پێشووی پۆلیسی فریاکەوتنی سلێمانی لەنێو دەستگیرکراوەکانی لالەزاردایە

ئاڤا نیوز

عەقید دڵشاد عەبدوڵڵا حەمە، بەڕێوەبەری پێشووی پۆلیسی فریاكەوتنی سلێمانی لەنێو ئەو کەسانەدایە کە لە لالەزار دەستگیر كراون و ئێستا لە زیندانیی کانی گۆمە دەستبەسەرە.

 

وێنە گەورەکە: بەرەبەیانیی ڕۆژی هەینی هێزێکی زۆری ئەمنیی یەکێتی بە چەکی قورسەوە هێرشیان کردە سەر هۆتێل لالەزار و شوێنی مانەوەی لاهوور شێخ جەنگی، سەرۆکی بەرەی گەل، دوای شەڕێکی سێ کاتژمێری ناوبراو و پۆڵاد شێخ جەنگی برای و ژمارەیەکی زۆر کەسی دیکە دەستگیر کران. 

لێدوانی فەرمی: ئاڤا میدیا پەیوەندی بە کەسوکاری عەقید دڵشاد حەمەوە كرد، باسیان لەوە کرد تاوەکو ئێستا هۆكاری دەستگیركردنەكەی نازانن. دەشڵێن: پەیوەندییان بە چەند كەس و لایەنێكەوە كردووە و بەڵێنی ئەوەیان پێدراوە ئازادی بكەن.

هاوکات ئاڤا میدیا پەیوەندیی بە بەرپرسانی ئاسایشی سلێمانییەوە كرد، بەڵام هیچ كەسێك ئامادە نەبوو زانیاریی لەوبارەیەوە بدات.

ئەوەی پێویستە بیزانیت: دڵشاد عەبدوڵڵا لەسەر پشکی بزووتنەوەی گۆڕان ساڵی 2014 پۆستی بەڕێوەبەری پۆلیسی فریاکەوتنی پارێزگای سلێمانی وەرگرتووە و هیچ كاتێك بە فەرمی لەنێو بەرەی گەل نەبووە، بەڵام كەسوكارەكەی دەڵێن، تەنیا هاوڕێی لاهوور شێخ جەنگی بووە.