بافڵ تاڵەبانی پۆستێکی نوێ وەردەگرێت

ئاڤا نیوز

بڕیارە سبەینێ، 27ی ئەم مانگە، کۆنگرەی هاوپەیمانیی حزبە سۆسیال دیموکراتەکانی وڵاتانی عەرەبی لە شاری سلێمانی دەست پێ بکات و تێیدا بافڵ تاڵەبانی، سەرۆکی یەکێتیی نیشتمانیی کوردستان، پۆستی سەرۆکایەتیی هاوپەیمانییەکە وەربگرێت.

ئەوەی پێویستە بیزانیت: بەپێی زانیارییەکان، کۆنگرەی هاوپەیمانیی حیزبە سۆسیال دیموکراتەکانی وڵاتانی عەرەبی تاوەکو 30ی ئەم مانگە بەردەوام دەبێت و تێیدا چەندین بابەتی گرنگ تاوتوێ دەکرێن و دەستاودەستی دەسەڵاتیش ئەنجام دەدرێت. لە ئێستادا سەرۆکایەتیی ئەم هاوپەیمانیەتییە لەلایەن حیزبی میسری ئیجتیماعی دیموکراتی میسرییەوە بەڕێوەدەبرێت، بەڵام لە کۆتایی کۆنگرەکەدا بافڵ تاڵەبانی ئەم پۆستە وەردەگرێت.

ئەمەش بزانە: هەر بەپێی کارنامەی کۆنگرەکە، لە ڕۆژی کۆتاییدا میوانەکان پیاسەیەک بەنێو شاری سلێمانیدا دەکەن.

بە تەنیشت ئەم بابەتەوە: ئەم کۆنگرەیە لەکاتێکدا بەڕێوەدەچێت کە چەند ڕۆژێک لەمەوبەر هێزەکانی یەکێتیی نیشتمانیی کوردستان هێرشیان کردە سەر لالەزار، کە بەهۆیەوە چەند کەسێک کوژران و بریندار بوون و بێسەروشوێن کران.