گه‌شته‌كانی عومره‌ به‌ڕێگەی ئاسمانی بە مەرج ده‌ستپێده‌كەنەوە

ئاڤا نیوز

لەماوەی ڕابردوو بەهۆی دواکەوتنی گەڕانەوەی عومرەکاران لە وڵاتی سعودییە لەلایەن کۆمپانیاکان لە هەرێمی کوردستان، بەڕێوەبەرایەتیی گشتیی حەج و عومرەی کوردستان سەرجەم گەشتە ئاسمانییەکانی عومرەی ڕاگرت.

چیرۆکی سەرەکی: دوای ئه‌وه‌ی به‌رێوه‌به‌رایه‌تیی گشتیی حه‌ج و عومره‌ی كوردستان له‌ ڕۆژی 19-8-2025 هه‌ڵویستی وه‌رگرت، هه‌موو گه‌شته‌ ئاسمانییه‌كانی عومرەی‌ بۆ وڵاتی سعوودییه‌ ڕاگرت له‌بەرامبەر نه‌گه‌ڕانه‌وه‌ی عومره‌كارانی كوردستان له‌ سعوودییه‌ و دواكه‌وتنی گه‌ڕانه‌وه‌یان به‌هۆی بریكاره‌كانی هێڵی ئاسمانی عیراقی، دوای وەرگرتنی بەڵێننامە لە کۆمپانیاکان ئەمڕۆ گەشتەکان دەستپێدەکەنەوە.

لێدوانی فەرمی: کاروان ستوونی، وتەبێژی حه‌ج و عومره‌ی هه‌رێمی كوردستان، بە ئاڤا میدیای ڕاگەیاند، "له‌گه‌ڵ سه‌رجه‌م خاوه‌ن كۆمپانیاكانی به‌رنامه‌فرۆش كۆبووینه‌وه‌، جه‌ختمان له‌سه‌ر مافی هاووڵاتیان و عومره‌ كرده‌وه‌ كه‌ ده‌بێت به‌ باشترین شێوه‌ خزمه‌ت بكرێن و نه‌دانی مافی عومره‌كار و دواكه‌وتنی گه‌شته‌كانیان به‌لای حكومه‌تی هه‌رێمی كوردستانه‌وه‌ هێلی سووره‌".

وتەبێژی حه‌ج و عومره‌ی هه‌رێمی كوردستان دەڵێت، ‌كۆمپانیاکان ده‌بێت به‌رپرسیارێتی دواكه‌وتنی گه‌شته‌كان هه‌ڵبگرن و به‌ڵێننامه‌ پڕ بكه‌نه‌وه‌ كه‌ هه‌موو عومره‌كاران له‌ كاتی خۆیاندا ببه‌ن و بگه‌رێننه‌وه‌، به‌ پێچه‌وانه‌وه‌ ڕووبه‌ڕووی لێپێچینه‌وه‌ی یاسایی و كارگێری و دارایی ده‌بنه‌وه‌.

وتەبێژی حه‌ج و عومره‌ی هه‌رێمی كوردستان ئاشکرای دەکات، سه‌رجه‌م كۆمپانیاكانی به‌رنامه‌فرۆش له‌ هه‌رێمی كوردستان كه‌ ژماره‌یان حه‌وت كۆمپانیایه‌ ئاماده‌ییان نیشاندا و به‌ڵێننامه‌یان له‌ دادنووس پڕكردەوە كه‌  پابه‌ندی هه‌موو خاڵه‌كان ده‌بن و پابه‌ندی هه‌موو ڕێنماییه‌كانی به‌ڕێوه‌به‌رایه‌تیی گشتیی حه‌ج و عومره‌ی كوردستان ده‌بن.

ڕوونیشی کردەوە، بەڕێوەبەرایەتیی گشتیی حەج و عومرەی هەرێمی کوردستان، بڕیاریدا له‌گه‌ڵ ته‌واوبوونی به‌ڵێننامه‌كان، گه‌شته‌كانی ئاسمانی بۆ عومره‌ ده‌ستپێبكرێنه‌وه‌ و گه‌شته‌كان ئاسایی ببنه‌وه‌ به‌و جۆره‌ی كه‌ هه‌موو مافێكی عومره‌كارانیان گه‌ره‌نتی كردووه‌.

ئەوەی پێویستە بیزانیت: گەشتەکانی عومرە لە هەرێمی کوردستان لە 16-7-2025 بەڕێگەی وشکانی دەستی پێکردەوە و 18ـی هەمان مانگیش بەڕێگەی ئاسمانی دەستیان پێکردەوە.