ئاسایشی عێراق تۆڕێکی بازرگانی کردن بە مرۆڤ لە بەغدا دەستگیر دەکات

ئاڤا نیوز

ئاسایشی عێراق تۆڕێکی بازرگانی کردن بە مرۆڤ لە ناوچەی عەرەب جبووری لە باشووری بەغدای پایتەخت دەستگیر دەکەن، یەکێک لە ئەندامەکانی "ژنێکی ئوردنی" هەڵگری ڕەگەزنامەی عێراقییە.

 

وێنە گەورەکە: ڕاپۆرتە نێودەوڵەتییەکان سەبارەت بە بەرەنگاربوونەوەی بازرگانی کردن بە مرۆڤەوە، ئاشکرایان کردووە، عێراق هێشتا لە ڕیزبەندی ئەو وڵاتانەدایە کە لەم دۆسیەیەدا ڕووبەڕووی ئاستەنگی جددی بووەتەوە، بەتایبەتی لەو ناوچانەی کە بەدەست پشێوی ئەمنی یان خراپی دۆخی ئابوورییەوە گرفتارن، ئەمەش ژینگەیەکی لەبار بۆ ئەم تاوانانە دەڕەخسێنێت.

 

زانیاریی بەدەستهاتوو: بەگوێرەی ئەو زانیارییانەی سەرچاوەکی ئەمنی بە میدیای عێراقی داوە، هێزە ئەمنییەکانی بەغدا توانیویانە تۆڕێکی تایبەت بە بازرگانی کردن بە مرۆڤ لە ناوچەی عەرەب جبوور دەستگیر بکەن.

 

زانیاریی زیاتر: هەر بەگوێرەی سەرچاوەکە، ئۆپەراسیۆنەکە بووە هۆی دەستگیر کردنی هەریەک لە تۆمەتباران: "ت. ا. غ. س" لەدایکبووی ساڵی 1991، "م. ح. م. ع" لەدایکبووی ساڵی 2005، "م. ع. ل. ع" لەدایکبووی ساڵی 2004، "د. ع. ع. ن" لەدایکبووی ساڵی 2001، کە بە ڕەچەڵەک ئوردنییە و هەڵگری ڕەگەزنامەی عێراقییە.

 

لەلایەکی دیکەوە: سەرچاوەکە ئاماژەی بەوەدا کە داواکراوەکان بەپێی ماددەی “6/یەکەم” لە یاسای بەرەنگاربوونەوەی بازرگانی کردن بە مرۆڤ، بەگوێرەی پرۆتۆکۆلێکی فەرمی ڕادەستی لایەنی داواکار کراون و ئاماژەی بەوەشدا کە ناوچەکە دەکەوێتە سنووری کارەکانی فیرقەی دووەم – لیوای حەوتەم – فەوجی دووەم – سریەی سێیەمی پۆلیسی فیدراڵی.