بەهۆی کڕینی کارتی دەنگدان و پێدانی بەڵێنی جۆراوجۆر کاندیدێکی هەڵبژاردن دەستگیر دەکرێت

ئاڤا نیوز

دەستەی دەستپاکیی عێراق، کاندیدێکی هەڵبژاردن بە تۆمەتی کڕینی کارتی دەنگدەران و بەڵێنی درۆ لە پرۆسەی هەڵبژاردنی داهاتووی پەرلەمانی عێراق دوور دەخاتەوە و کاندیدەکە و چوار لە یاریدەدەرەکانی دەستگیر دەکرێن.

چیرۆکی سەرەکی: دەزگای ئاسایشی نیشتمانیی عێراق بە هەماهەنگی لەگەڵ دادگای کەرخی دووەم ئۆپەراسیۆنێکیان ئەنجام دا و دەستیان بەسەر کۆمەڵێک بەڵگەدا گرت کە یەکێک لە کاندیدەکانی هەڵبژاردنی داهاتووی پەرلەمانی عێراق لەگەڵ چوار لە یاریدەدەرانی شوێنێکیان دابینکردووە، کارتی دەنگدان لە هاووڵاتیان دەکڕن و بەڵێنی دامەزراندن و دابینکردنی مووچەی چاودێریی کۆمەڵایەتیییان پێدەدەن.

ڕاگەیێنراوی فەرمی: دەستەی دەستپاکیی عێراق ڕایگەیاند، دوای ئەوەی دوو لە هاووڵاتیان سکاڵایان لەسەر کاندیدێکی هەڵبژاردنی عێراق تۆمار کرد لەسەر کڕینی کارتی دەنگدان و بەڵێنی دامەزراندن، "لێکۆلێنەوەمان دەستپێکرد و دەستمان بەسەر کۆمەڵێک بەڵگەدا گرت کە ئەو کاندیدە کارتی دەنگدان لە هاووڵاتیان دەکڕێت. هەروەها دەستمان بەسەر کۆمەڵێک کارتی فۆتۆکۆپی و فۆرمی تایبەت گرت کە ناوی دەنگدەر و ژمارەی هەڵبژاردن و ناوی ناوەند و وێستگە و پارێزگاری تێدابوو.

- لە ئۆپەراسیۆنەکەدا دوو لە یاریدەدەرانی بانگەشەی کاندیدەکە کە یەکێکیان بەڕێوەبەری هەڵمەتی هەڵبژاردنەکان بووە، بە تۆمەتی کڕینی کارتی دەنگدەران دەستگیرکران.

- دەست بەسەر دوو تۆماردا گیراوە کە ناو و ژمارەی تەلەفۆن و ناونیشانی دەنگدەرەکە بوون، یەکێک لە تۆمەتبارەکان لەناو فەرمانگەکەدا دەستگیرکراوە، کۆمەڵێک فۆرمی ستوونی و فۆتۆکۆپی کارتی هەڵبژاردنی کۆمەڵێک دەنگدەری پێبووە، لەگەڵ تۆمارێک کە ناوی دەنگدەر و ژمارەی دەنگدەر و پارێزگا و بنکەی دەنگدانی تێدابووە.

بەپێی ڕاگەیێنراوەکە، تۆمەتبارەکان شەش مۆبایل و کۆمپیوتەریان پێبووە، دوای وەرگرتنی لێدوانی تۆمەتباران و تۆمارکردنی لە دادگا، دادوەری دادگای تاوانەکانی ناوەندی بۆ بەرەنگاربوونەوەی گەندەڵی دوو فەرمانی دەستگیرکردنی بۆ کاندیدەکە و تۆمەتبارێکی دیکە دەرکرد. دوابەدوای لێکۆڵینەوە و گەڕان و پشکنین و هەماهەنگی لەگەڵ فەرمانگەی لێکۆڵینەوەی میسان، کاندیدەکە دەستگیرکرا و ڕادەستی بەڕێوەبەرایەتیی لێکۆڵینەوەی بەغدا کرا.

ئەوەی پێویستە بیزانیت: دەستەی دەستپاکی فیدراڵی سوپاسی ڕۆڵی هاووڵاتییان دەکات لەبەرامبەر پێدانی ڕاپۆرتی پێشێلکارییەکانی پڕۆسەی هەڵبژاردن، ئەمە ڕەنگدانەوەی هۆشیارییە بۆ گرنگی پاراستنی پرۆسەی دیموکراسی و ئەنجامدانی هەڵبژاردنێکی ئازاد و دادپەروەرانە، دوور لە کڕینی دەنگ و کارتی دەنگدان.